Bazar Samiti Results : विजयानंतर मिशीला मारला पीळ अन् थोपटलं दंड; साताऱ्यात शिवेंद्रराजेचं 'किंग'

सातारा : साताऱ्याच्या राजकारणात उदयनराजे आणि शिवेंद्रराजे (Shivendraraj Bhosale) विषय नवीन नाहीये. आता पुन्हा एकदा आय ॲम द किंग असल्याचं शिवेंद्रराजेंनी दाखवून दिलंय.

साताऱ्या जिल्ह्याचं लक्ष लागून राहिलेल्या सातारा कृषी उत्पन्न बाजार समितीत खासदार उदयनराजे भोसले (Udayanraje Bhosale) यांनी शेतकरी संघटनेच्या शिलेदारांच्या माध्यमातून बाजार समितीच्या निवडणुकीत शिवेंद्रराजेंना पराभूत करण्याची रणनीती आखली होती. प्रत्यक्ष स्वतः पॅनल न उभं करता शेतकरी संघटनेला तुम्ही पुढं चला, आमचा आरमार तुमच्या बरोबर आहे, असं सांगत थेट निवडणुकीत प्रत्यक्ष-अप्रत्यक्ष ताकद दिली.

त्यामुळं सातारा जिल्ह्याला (Satara Bazar Samiti Election Results) या निकालाची उत्सुकता होती. दरम्‍यान, एक मे महाराष्ट्र दिनाला सकाळच्या सत्रातच पटापट निकाल बाहेर आले आणि विरोधकांचा फुगा फुटला. निकाल बाहेर येताच शिवेंद्रराजेंच्या कार्यकर्त्यांचा उत्साह शिगेला पोहोचला.

एकच राजे बाबा राजे.. कार्यकर्त्यांच्या उत्साहाला उधाण

एकच राजे बाबा राजे म्हणत शिवेंद्रराजांच्या कार्यकर्त्यांना विजयाच्या उत्साहात आकाश ठेंगणं वाटू लागलं. तितक्यात 18/0 चा नारा निवडणूक निर्णय अधिकाऱ्यांनी दिल्यानंतर प्रत्यक्ष मैदानात किंग मेकर शिवेंद्रराजे उतरले. शिवेंद्रराजे निवडणूक निकाल मैदानात येताच कार्यकर्त्यांना उत्साहाला उधाण आलं.

शिवेंद्रराजेंनी मिशीला दिला पीळ

शिवेंद्रराजेंना हजारो कार्यकर्त्यांनी खांद्यावर घेत गुलालाची उधळण करत जणू विधानसभेचा माहोलच तयार केला. दोन्हीही हाताची व्हिक्टरी करत नकळत शिवेंद्रराजेंनी उदयनराजेंच्या दिशेनं दाखवली. उत्साहात भारावून गेलेल्या कार्यकर्त्यांना आनंदाचा जल्लोष आवरेना. यातच शिवेंद्रराजेंनी आधी आपल्या मिशीला पीळ दिला, नंतर दंड थोपटला व साताऱ्यात कार्यकर्त्यांच्या उत्साहात आपला जलवा दाखवून दिला.