मुकवली माचीत अखेर उगवली पहाट!, तब्बल 13 दिवसांनी वीजपुरवठा

केळघर (जि. सातारा) : मुकवली माची (ता. जावळी) येथील खंडित झालेला वीजपुरवठा वीज वितरण कंपनीच्या मेढा व महाबळेश्वर येथील कर्मचाऱ्यांनी तब्बल 13 दिवसांनी काम करून पूर्ववत केला. याबाबतचे वृत्त "सकाळ'ने प्रसिद्ध केल्याने त्याची तातडीने दखल घेऊन ही दुरुस्ती केली आहे. 

जावळी आणि महाबळेश्वर या दोन तालुक्‍यांच्या सीमेवर असलेल्या मुकवली माची येथील वीजपुरवठा मध्यंतरी दहा ते 12 दिवसांपूर्वी आलेल्या निसर्ग वादळामुळे खंडित झालेला होता. वादळामुळे विजेचे चार खांब मोडून पडले होते, तर विजेच्या तारा तुटून लोंबकळत पडलेल्या होत्या. त्यामुळे मुकवली माची येथील काही ग्रामस्थ वर्ग तब्बल दहा ते बारा दिवस अक्षरशः अंधारात होते. काही वस्त्यांवर विजेअभावी ऐन पावसाळ्यात पाणीपुरवठा बंद झाल्याने तीव्र पाणीटंचाई जाणवत होती, तर महावितरण कंपनीचे अधिकारी हे गाव कोणाच्या हद्दीत या कारणावरून खंडित वीजपुरवठा दुरुस्ती करण्याबाबत दुर्लक्ष करत होते. 

दरम्यान, याबाबत "सकाळ'ने 11 जून रोजी "हद्दीच्या वादात दहा दिवस मुकवली माची अंधारात!' या शीर्षकाखाली वृत्त प्रसिद्ध केले. त्याची दखल घेत वीज वितरण कंपनीचे मेढा येथील उपकार्यकरी अभियंता प्रशांत गाडे, सहायक अभियंता राहुल कवठे, तसेच महाबळेश्वर येथील वीज वितरण कंपनीच्या अधिकाऱ्यांनी मेढा व महाबळेश्वर येथील कर्मचाऱ्यांना काल (ता. 11) मुकवली माची येथे पाठवले. त्यांनी दिवसभर काम करून काल रात्री तेथील वीजपुरवठा सुरळीत केला. वीजपुरवठा सुरळीत झाल्याने ग्रामस्थांनी "सकाळ' व वीज वितरण कंपनीचे अधिकारी, कर्मचाऱ्यांचे अभिनंदन केले. 

हद्दीच्या वादाच काय झाले? 

मुकवली माची येथे खंडित झालेला वीजपुरवठा दुरुस्ती करण्याबाबत वीज वितरण कंपनीच्या महाबळेश्‍वर आणि मेढा कार्यालयाकडून सुरवातीला हद्दीच्या वादातून टाळाटाळ केली जात होती. मात्र, "सकाळ'मध्ये वृत्त प्रसिद्ध झाल्यानंतर प्रत्यक्षात दोन्ही कार्यालयांतील अधिकारी व कर्मचाऱ्यांनी तातडीने दुरुस्ती केल्याने हद्दीच्या वादाच काय झाले? हा प्रश्‍न गुलदस्त्यात राहिला आहे.