यांत्रिक युगातही "चल रं सर्जा'ची हाळी!

मल्हारपेठ (जि. सातारा) ः मल्हारपेठ व दिवशी परिसरात पिकांच्या आंतरमशागतीची कामे हातघाईवर आहेत. खुरपणी, भांगलणीसह पारंपरिक बैलकोळपणीची कामेही जोमात सुरू असून पेरणीनंतर पावसाच्या विश्रांतीमुळे कोळपणीच्या कामाला वेग आला आहे. पिके समाधानकारक असून भात लागणीसाठीही शेत तयारीच्या कामाला सुरवात झाली आहे. भाताचे तरवेही समाधानकारक असल्याने बळिराजा मोठ्या पावसाच्या प्रतीक्षेत आहे. 

गतवर्षीपेक्षा यावर्षी जादा उत्पन्न मिळेल, या आशेने बळिराजाने आंतरमशागतीची कामे पूर्ण केली. बहुतांश डोंगराळ भागात जंगली श्‍वापदांकडून पिकांचे प्रचंड नुकसान होत असल्याने अनेकांनी शेती करण्याचे सोडून दिले होते. मात्र, तब्बल तीन महिन्यांत कोरोना संसर्गाच्या लॉकडाउनमध्ये गावी परतलेल्या चाकरमान्यांनी पुन्हा पडीक शेतीची मशागत करून पेरणी केली असून शेतात पिकांची उगवण चांगल्या प्रकारे दिसत आहे. 

सध्या ग्रामीण भागात बैलाच्या साह्याने शेतीची मशागत करण्याची पद्धत जवळपास नामशेष होण्याच्या मार्गावर आहे. सगळीकडे यांत्रिक पद्धतीचा वापर होत असल्याने बैल सांभाळणे अवघड झालं आहे. मात्र, तरीही पाटण तालुक्‍याच्या चाफळ, उरुल, दिवशी, कोयना, मोरगिरी भागात आजही बैलजोडीच्या साह्याने कुळवट, नांगरट, पेरणी, चिखलणी, कोळपणी आणि भाताच्या सुगीत भात मळणीच्या कामास बैलजोडीचा वापर केला जात आहे. भात, सोयाबीन, भुईमूग, हायब्रीड इत्यादी पिकांची कोळपणीची कामे सुरू आहेत. सध्या खुरपणी, कोळपणीच्या कामाने सर्वत्र चांगलाच वेग घेतला असल्याने पिकांची आंतरमशागतीची कामे अंतिम टप्प्यात आली असून बळिराजा मोठ्या पावसाच्या प्रतीक्षेत आहे. पाऊस सुरू होताच परिसरात भात लागणीची कामे जोर धरण्याची आशा आहे. 

काेराेनावरील इंजेक्शन आलं, पण आपल्याला परवडणार नाही : शरद पवार