कोरेगाव : मतदारांची पुरवणी यादी प्रसिद्ध; एकूण ४७१ जणांचा समावेश

कोरेगाव : कोरेगाव नगरपंचायतीच्या निवडणुकीसाठी प्रसिद्ध केलेल्या अंतिम मतदार यादीबाबत अक्षय बर्गे यांनी आक्षेप घेणारे निवेदन प्रांताधिकारी तथा कोरेगाव नगरपंचायतीच्या निवडणूक निर्णय अधिकारी व राज्याच्या निवडणूक आयोगाकडे दिल्याच्या पार्श्वभूमीवर सहायक निवडणूक निर्णय अधिकाऱ्यांनी ४७१ मतदारांची पुरवणी यादी प्रसिद्ध केली आहे. त्यामुळे आता एकूण मतदार संख्या १९ हजार ९०९ एवढी झाली आहे.

नगरपंचायतीच्या निवडणुकीसाठीची अंतिम मतदार यादी प्रसिद्ध झाल्यानंतर आक्षेप घेणारे निवेदन प्राप्त होताच प्रशासनाची धावाधाव सुरू झाली. नगरपंचायतीच्या मुख्याधिकारी तथा सहायक निवडणूक निर्णय अधिकारी विजया घाडगे यांनी बीएलओ यांना नोटीस काढली होती. या पार्श्वभूमीवर विजया घाडगे म्हणाल्या, ‘‘नावे वगळली गेली होती म्हणूनच पुरवणी यादी प्रसिद्ध केली आहे. चुका झाल्याचे आम्ही मान्यच करतो.

मृत व स्थलांतरितांची नावे वगळली आहेत; परंतु आम्ही कोणालाही मतदानापासून वंचित नव्हते केले. फक्त दुबार नाव येऊ नये, हा उद्देश होता. आता पुरवणी यादी प्रसिद्ध करून ती नावे ॲड केली आहेत.’’ विधानसभा मतदारसंघ यादीतील एकूण मतदार संख्या २० हजार १८८ आहे. मग नगरपंचायतीच्या मतदार यादीतील एकूण मतदार संख्या १९ हजार ९०९ आहे. ही तफावत कशी? यावर मुख्याधिकारी घाडगे म्हणाल्या, ‘‘मागच्या इलेक्शनची आम्ही फाइल काढली. त्यामध्ये भाग नऊ हा पूर्णतः गोळेवाडीचा आहे व भाग दहा हा अंशतः गोळेवाडी व कोरेगाव शहराचा आहे. गोळेवाडी हद्दीतील जी नावे आहेत, असे आम्हाला वाटते, ती नावे आम्ही वगळली आहेत. त्या ग्रामपंचायतीच्या हद्दीतील नावे आमच्या यादीत घेतली असती, तर पुन्हा आमच्यावर आरोप झाले असते.’’

डुप्लिकेट नावांसाठी खटाटोप कोणाचा?

मुख्याधिकारी घाडगे म्हणाल्या, ‘‘काही लोकांनी दुसऱ्या गावातील लोकांचे खोटे आयकार्ड बनवून त्यांची डुप्लिकेट नावे यादीमध्ये घातली होती, ती नावे आम्ही चांगल्या हेतूने वगळली होती; परंतु ते अधिकार आम्हाला नाहीत, तर महसूलला आहेत.’’ त्यावरून डुप्लिकेट नावांसाठी खटाटोप करणारे कोण कोण आहेतच? असा प्रश्न उपस्थित होत आहे.