मायणीजवळील अपघातात लातूरचा युवक जागीच ठार; मानमोडी शाेकसागरात

मायणी (जि. सातारा) : येथून पंढरपूरकडे जाणाऱ्या राज्य महामार्गावर देशमुख वस्तीनजीक (विखळे, ता. खटाव) रविवारी कार व दुचाकीचा समोरासमोर अपघात झाला. त्यामध्ये दोन युवकांचा जागीच मृत्यू झाला, तर चौघे जखमी झाले असून त्यांच्यावर साताऱ्यात उपचार सुरू आहेत. (satara-marathi-news-two-died-in-road-accident-mayni-latur)

सूरज राजाराम माळी (वय २७, रा. मायणी (मानमोडी), ता. खटाव) व संतोष किसनराव बिराजदार (वय ४०, रा. सय्यदपूर, ता. देवणी, जि. लातूर) अशी मृतांची नावे आहेत. राजकुमार बिराजदार (वय २५), ज्योतिराम धनाजी बिराजदार (वय ३५), दत्ता बिराजदार (वय ३२), महेश विठ्ठल झोळकुडे (वय २४) (सर्वजण रा. सय्यदपूर, ता. देवणी, जि. लातूर) असे चार तरुण गंभीर जखमी झाले. सर्व जखमींना उपचारासाठी सातारा येथील जिल्हा रुग्णालयात दाखल करण्यात आले. घटनेची नोंद मायणी पोलिसात झाली आहे.

याबाबत घटनास्थळ व पोलिसांकडून मिळालेली माहिती अशी : मल्हारपेठ-पंढरपूर राज्य महामार्गावर येथून पंढरपूरकडे जाताना सुमारे सात किलोमीटर अंतरावर देशमुखवस्ती आहे. त्या वस्तीनजीक दुपारी चारच्या दरम्यान अपघात झाला.

दुचाकीस्वार हे दुचाकीवरून (क्र. एमएच ११ सीएफ ८५१९) मायणीकडे येत होते, तर कार (क्र. एमएच १४ जीयू ६७९८) पंढरपूरच्या दिशेने निघाली होती. देशमुख वस्तीनजीक छोट्याशा वळणावर दोन्ही वाहनांची समोरासमोर जोरदार धडक झाली. त्यामध्ये दोघांचा जागीच मृत्यू झाला. तर चारचाकी गाडीतील अन्य चार जण गंभीर जखमी झाले.

या अपघातात वाहनांचेही मोठे नुकसान झाले. लातूरकडे निघालेले तरुण जोतिबा (कोल्हापूर) दर्शनासाठी गेले होते. दरम्यान, अपघाताचा मोठा आवाज येताच परिसरातील वस्त्यांवरील रहिवाशांनी घटनास्थळी धाव घेत अपघाग्रस्तांना मदत केली. पोलिसांनाही कळविले. जखमींना पुढील उपचारासाठी सातारा येथील जिल्हा शासकीय रुग्णालयात दाखल करण्यात आले आहे.