अभ्यासू नेतृत्व हरपल्याने राज्याची मोठी हानी; मुख्यमंत्र्यांची विलासकाकांना श्रद्धांजली

सातारा : काँग्रेसचे ज्येष्ठ नेते, माजी सहकार मंत्री विलासकाका पाटील-उंडाळकर याचं आज (सोमवारी) पहाटे उपचार सुरू असताना सातारा येथे निधन झाले. त्यांच्यावर त्यांच्या मूळगावी उंडाळे येथे अंत्यसंस्कार करण्यात आले. विलासकाकांच्या निधनाबद्दल मुख्यमंत्री उद्धव ठाकरे यांनीही शोक व्यक्त केला आहे. राज्याच्या सहकार, ग्रामविकास यांसह सामान्यांच्या जीवनाशी निगडीत महत्वपूर्ण विषयांतील अभ्यासू आणि मार्गदर्शक नेतृत्व हरपले आहे, अशा शब्दांत मुख्यमंत्र्यांनी विलासरावांना श्रद्धांजली अर्पण केली आहे. त्यांच्या निधनाने राज्याची मोठी हानी झाल्याचेही त्यांनी म्हटले आहे. 

पूर्वीच्या दुर्गमडोंगराळ भागातील उंडाळे येथे जन्मलेल्या विलासराव पाटील यांना त्यांच्या वडिलांचा मोठा वारसा लाभला. स्वातंत्र्य चळवळीत त्यांनी मोठे योगदान दिले. त्यांचा वारसा विलासकाका यांनी पुढे चालवला. स्वातंत्र्य सेनानी कुटुंबांचा वारसा जपत विलासकाका यांनी सुरू केलेली राजकीय वाटचाल समाजकारणाशी जोडलेली होती. राज्याच्या मंत्रिमंडळात त्यांनी विविध जबाबदाऱ्या सांभाळून सहकार, ग्रामविकास, जलसंधारण या क्षेत्रात भरीव असे काम केले.

काकांनी उदयनराजेंना राजकारणातील हिरो बनविले 

अनेक संस्था आणि सामाजिक उपक्रमांना त्यांनी जाणीवपूर्वक बळ दिले. विविध विषयांतील गाढा अभ्यास आणि परखडपणामुळे ते अनेकांसाठी मार्गदर्शक व्यक्तिमत्व होते. त्यांच्या निधनामुळे राज्याच्या राजकारण-समाजकारणातील दोन पिढ्यांना जोडणारे मार्गदर्शक नेतृत्व हरपले आहे. ज्येष्ठ नेते माजी मंत्री विलासराव पाटील-उंडाळकर यांना विनम्र श्रद्धांजली, अशा शब्दांत मुख्यमंत्री उद्धव ठाकरे यांनी श्रद्धांजली अर्पण केली आहे. विलासकाकांच्या निधनाने राज्याची मोठी हानी झाल्याचेही त्यांनी म्हटले आहे. 

https://www.facebook.com/UddhavBalasahebThackeray/posts/3609314729183867