'मायणी-पंढरपूर महामार्गावरील वीज वाहिनीचे काम निकृष्ट करणाऱ्यांवर गुन्हे दाखल करा'

वडूज (जि. सातारा) : मायणी (ता. खटाव) येथील लघुदाब भूमिगत वीज वाहिनीचे काम निकृष्ट दर्जाचे करणाऱ्या ठेकेदारास काळ्या यादीत टाकून त्याच्यावर फौजदारी गुन्हा दाखल करावा, अशी मागणी माजी आमदार डॉ. दिलीप येळगावकर यांनी केली आहे. 

याबाबत डॉ. येळगावकर यांनी दिलेल्या माहितीनुसार, मायणी-पंढरपूर महामार्गाचे काम सुरू आहे. याठिकाणी वीज वितरण कंपनीच्या वडूज उपविभागातील मायणी शाखेंतर्गत येथील लघुदाब भूमिगत वीज वाहिनीचे काम करण्यात येत आहे. या लघुदाब भूमिगत वीज वाहिनीच्या कामात अनेक त्रुटी आढळून आलेल्या आहेत. त्यासंदर्भात वीज वितरण कंपनीने हे काम करणाऱ्या ठेकेदाराला सूचनादेखील केली आहे. 

हे पण वाचा- Breaking News : अपहरण प्रकरणी सेनेच्या नेत्यावर गुन्हा दाखल

मात्र, संबंधित ठेकेदाराने या सूचनेकडे दुर्लक्ष केले आहे. याठिकाणी करण्यात आलेले भूमिगत वीज वाहिनीचे काम दोन वेळा बंद पडले आहे, तसेच संबंधित ठेकेदाराने हे काम अर्धवट सोडले असून, उर्वरित काम करण्यासाठी दुर्लक्षितपणाची भूमिका घेतल्याचे डॉ. येळगावकर यांनी सांगितले. याबाबत संबंधित ठेकेदारास सांगितले असता त्याच्याकडून उडवाउडवीची उत्तरे देण्यात येत आहेत. याबाबत आपण वीज वितरण कंपनीच्या अधिकाऱ्यांशी संपर्क साधून माहिती दिली असून, संबंधित ठेकेदारास काळ्या यादीत टाकून त्याच्यावर फौजदारी गुन्हा दाखल करण्याची मागणी केल्याचे डॉ. येळगावकर यांनी सांगितले. 

साताऱ्याच्या बातम्या वाचण्यासाठी येथे ► क्लिक करा

संपादन : बाळकृष्ण मधाळे