वाह, क्या बात है! वाढदिनी गटविकास अधिकाऱ्यांनी बांधले केळघर परिसरात बंधारे

केळघर (जि. सातारा) : वाढदिवसादिवशी कोणताही बडेजावपणा न करता जलसंधारणाचे काम करून केळघर परिसरात गटविकास अधिकारी सतीश बुद्धे यांनी सपत्नीक श्रमदान करून ग्रामस्थ, सरपंच, ग्रामसेवक, ग्रामपंचायत कर्मचाऱ्यांच्या साहाय्याने एकाच दिवसात तीन वनराई बंधारे बांधले. या बंधाऱ्यामुळे परिसरातील पाणी पातळीत निश्‍चित वाढ होईल, असा विश्वास तहसीलदार राजेंद्र पोळ यांनी व्यक्त केला. 

जावळीचे गटविकास अधिकारी सतीश बुद्धे यांच्या वाढदिवसानिमित्त केळघर येथे वनराई बंधाऱ्याच्या प्रारंभप्रसंगी ते बोलत होते. यावेळी सतीश बुद्धे, मयूरी बुद्धे, विस्तार अधिकारी श्री. सानप, केळघरचे सरपंच रवींद्र सल्लक, उपसरपंच बजरंग पार्टे, शिक्षक बॅंकेचे संचालक शंकर जांभळे, ग्रामसेवक आर. बी. सपकाळ, अमोल गायकवाड, एन. के. जाधव, एस. एच. निर्मल, संतोष देशमुख, अधिक जाधव, सुनील देशमुख, संदीप सावंत, संजय जुनघरे उपस्थित होते. 

ग्रामपंचायत निवडणुक : नेचल, मेंढेघरसह हुंबरळीत देसाई-पाटणकर गटात लढत

श्री. बुद्धे म्हणाले, "केळघर परिसरात सर्वाधिक पाऊस पडतो. मात्र, तीव्र उताराची जमीन असल्याने पाणी वाहून जाते. त्यामुळे वाढदिवसादिवशी अनावश्‍यक खर्च टाळून जलसंधारण करण्यासाठी वनराई बंधारे उभे करण्याचा निर्णय घेतला. या उपक्रमाला सर्वांनीच साथ दिल्यामुळे केळघरला दोन बंधारे व पुनवडीत एक बंधारा असे तीन बंधारे उभे राहिले आहेत. भविष्यात महसूल विभाग, कृषी विभागाच्या सहकार्यातून केळघर परिसरात जलसंधारणाची कामे प्रभावीपणे राबवू. 

संपादन : बाळकृष्ण मधाळे