अवैध धंद्यांवर कडक कारवाई करणार; पोलिस अधीक्षक बन्सलांचा इशारा

सातारा : अवैध धंद्यांना जिल्ह्यात बिलकूल थारा दिला जाणार नाही. त्यामुळे त्याकडे दुर्लक्ष करणाऱ्या पोलिस ठाण्याच्या संबंधित अधिकारी व कर्मचाऱ्यांवर जबाबदारी निश्‍चित करण्याचा इशारा पोलिस अधीक्षक अजय कुमार बन्सल यांनी दिला आहे. त्यामुळे पोलिस ठाण्यांना आता अधिक सतर्क व्हावे लागणार आहे. 

सहायक पोलिस अधीक्षक आंचल दलाल यांनी दोन दिवसांपूर्वी करंजे परिसरात चाललेल्या एका मोठ्या जुगार अड्ड्यावर कारवाई केली. या वेळी 50 लोक एकाच ठिकाणी एकत्र जमून जुगार खेळत असल्याचे समोर आले. एखाद्या कंपनी किंवा कार्यालयात असते, तशी आधुनिक थम इंप्रेशनची यंत्रणा प्रवेशासाठी या अड्ड्यावर बसविण्यात आली होती. दीड वर्षाहून अधिक काळ हा अड्डा या ठिकाणी सुरू असल्याची माहिती कारवाईनंतर समोर आली आहे. प्रत्यक्ष कारवाईवेळीही भरवस्तीत चालणारा एवढा मोठा जुगार अड्डा सुरू असल्याचे पाहून कारवाई करणाऱ्या पोलिस अधिकारी व कर्मचाऱ्यांनाही धक्का बसला होता. त्यामुळे स्थानिक पोलिसांचे या अड्ड्याकडे दुर्लक्ष असल्याचे समोर आले. पोलिसांच्या निदर्शनास न येता हा अड्डा एवढे दिवस कसा सुरू होता, असा प्रश्‍नही सर्वसामान्य नागरिकांना पडला आहे. 

जिद्द असावी तर अशी! खोजेवाडीच्या विद्यार्थ्याने बनविला मोबाईल चार्जर; टाकाऊ वस्तूंपासून अनोखी नवनिर्मिती

वास्तविक पोलिस अधीक्षकांनी पदभार स्वीकारल्यानंतरही अवैध धंदे कोणत्याही परिस्थितीत सुरू राहणार नाहीत, अशी भूमिका घेतली होती. तरीही शहरासह जिल्ह्यामध्ये विविध प्रकारचे अवैध धंदे सुरूच आहेत. त्यावर किरकोळ कारवाया होतातही. परंतु, पुन्हा धंदे त्याच ठिकाणी सुरू राहतात. त्यामुळे स्थानिक पोलिसांचे त्याकडे दुर्लक्ष आहे की काय, असा प्रश्‍न निर्माण होतो. करंजे परिसरातील कारवाईमुळे ते पुन्हा समोर आले. त्यामुळे पोलिस अधीक्षकांनी याबाबत कठोर भूमिका घेण्याची गरज असल्याची भूमिका "सकाळ'ने मांडली होती. त्याची दखल घेत अवैध धंदे व त्यांना पाठीशी घालणाऱ्यांबाबत अधीक्षक बन्सल यांनी कठोर भूमिका घेणार असल्याचे स्पष्ट केले आहे.

चिंताजनक! जावळी तालुक्यात कोरोनाचा पुन्हा शिरकाव; भागात कंटेन्मेंट झोन जाहीर

अधीक्षक बन्सल म्हणाले, ""अवैध धंद्यांबाबत मी सुरवातीपासूनच कठोर भूमिका घेतली आहे. त्याबाबत सर्व पोलिस ठाण्यांच्या अधिकाऱ्यांना कागदोपत्री सूचनाही दिलेल्या आहेत. क्‍लब असो वा कोणत्याही अवैध धंद्यांना जिल्ह्यात कायदेशीर परवानगी नाही. त्यामुळे अशा गोष्टी समोर आल्यास त्याबाबतची जबाबदारी संबंधित अधिकारी व कर्मचाऱ्यांवर निश्‍चित करण्यात येईल. त्यांच्यावर कारवाई करण्यात येईल, असेही त्यांनी स्पष्ट केले.'' 

National Science Day 2021 : किल्ले अजिंक्यता-यावरुन रेडिओ संदेशांची होणार देवाण-घेवाण

थेट संपर्क साधा : अजय कुमार बन्सल 

कोणत्याही प्रकारच्या अवैध धंद्यांना जिल्ह्यात थारा दिला जाणार नाही. त्यासाठी नागरिकांनीही सहकार्य करावे. जिल्ह्यात कोठेही अवैध धंदे सुरू असल्यास थेट माझ्याशी संपर्क साधावा, असे आवाहन पोलिस अधीक्षक अजय कुमार बन्सल यांनी केले आहे. त्यावर तातडीने कारवाई केली जाईल, असेही त्यांनी स्पष्ट केले. 

साताऱ्याच्या बातम्या वाचण्यासाठी येथे ► क्लिक करा

संपादन : बाळकृष्ण मधाळे