नियमित कर्ज परतफेड करणाऱ्यांना 50 हजार देणारच...

सातारा : मंत्री पाटील हे आज मुंबईला जाताना साताऱ्यातील हॉटेल प्रीती येथे थोडावेळ थांबले होते. त्या वेळी त्यांची आमदार मकरंद पाटील, जिल्हा बॅंकेचे उपाध्यक्ष सुनील माने, प्रभाकर घार्गे, बॅंकेचे संचालक नितीन पाटील यांनी भेट घेतली, तसेच कर्जमुक्ती अभियानातील विविध मागण्यांचे निवेदन दिले. 

कर्जमुक्ती योजनेत दोन लाखांच्या आतील पात्र कर्जदारांचा समावेश आहे. तथापि मूळ कर्ज रक्कम दोन लाखांपेक्षा कमी असणारी व व्याजामुळे एकत्रित रक्कम दोन लाखांपेक्षा जादा होणारी, तसेच मूळ कर्ज दोन लाखांपेक्षा जास्त असणाऱ्या थकीत शेतकऱ्यांना या योजनेचा लाभ मिळत नाही. त्यामुळे दोन लाखांवरील थकबाकीदार सभासदांना किमान दोन लाखांपर्यंतचा लाभ मिळणे आवश्‍यक आहे. शासनाने सध्या स्वीकारलेल्या धोरणाप्रमाणे दोन लाखांपर्यंतच्या शेतकऱ्यांना ज्याप्रमाणे बॅंकांना शासन येणे दाखवून नवीन कर्जवाटप करण्याच्या सूचना केल्या आहेत. त्याच पद्धतीने दोन लाखांवरील थकबाकीदार शेतकऱ्यांनाही दोन लाखांपर्यंतची रक्कम शासन येणे दाखवून उर्वरित रक्कम भरून नवीन कर्जवाटप करण्याचा शासन निर्णय होणे आवश्‍यक आहे, अशी अपेक्षा उपस्थितांनी व्यक्‍त केली, तसेच जिल्हा बॅंकेने कॅश क्रेडिट पीक कर्ज योजना नियमित व्याजदराने सुरू केली आहे. या कर्ज योजनेचा समावेश महात्मा जोतिराव फुले शेतकरी कर्जमुक्ती योजनेत करून घेण्याची मागणीही त्यांनी केली. 

याबाबत मंत्री जयंत पाटील म्हणाले, ""शेतकरी कर्जमाफी संदर्भात सरकार गंभीर आहे. कोरोनामुळे अडचणी आल्या. मात्र, कोरोनाचा काळ संपताच शेतकऱ्यासंदर्भात केलेल्या घोषणांबाबत अंमलबजावणी करण्यासाठी आमची वाटचाल राहील. त्यामुळे शेतकऱ्यांनी निश्‍चिंत राहावे.'' या वेळी जिल्हा बॅंकेचे मुख्य कार्यकारी अधिकारी डॉ. राजेंद्र सरकाळे, शशिकांत पिसाळ, राजकुमार पाटील, नारायण जाधव, भरत देशमुख, जितेंद्र कदम, धीरज नलावडे व पदाधिकारी उपस्थित होते. 
 

खदखद राज्य सरकारमध्ये, खलबते कऱ्हाडमध्ये?