सातारा : ट्रकला धडक दिल्याने दुचाकीस्वाराचा मृत्यू

सातारा : पुणे-बंगळूर (Pune-Banglore) राष्ट्रीय महामार्गावर येथील शिवराज पेट्रोलपंपाजवळ काल रात्री ट्रकला पाठीमागून धडक दिल्याने दुचाकीस्वाराचा जागीच मृत्यू झाला. विनायक बाबूराव गोसावी (वय ४०, रा. केदारेश्वर कॉलनी, ता.कोरेगाव) असे अपघातात ठार झालेल्याचे नाव आहे.

विनायक हे शेंद्रे येथे जेसीबी चालकाचे काम करत होते. काल रात्री दुचाकीवरून ते नातेवाईकाला सोडण्यासाठी एका लहान मुलाला घेऊन येथील मुख्य बस स्थानकात गेले होते. नातेवाईकाला सोडल्यानंतर ते लहान मुलासह दुचाकीवरून शेंद्रे येथे निघाले होते. त्यावेळी जोरदार पाऊस पडत होता. महामार्गावरील शिवराज पेट्रोलपंपाजवळ त्यांच्या दुचाकीची पुढे चाललेल्या ट्रकला जोरदार धडक बसली.

त्यात त्यांच्या डोक्याला गंभीर जखम झाली. मोठा रक्तस्‍त्राव झाल्याने त्यांचा जागीच मृत्यू झाला. त्यांच्यासोबत असलेले लहान मूल किरकोळ जखमी झाले आहे. जखमी मुलाला उपचारासाठी रुग्णालयात दाखल करण्यात आले आहे. अपघाताची नोंद शहर पोलिस ठाण्यात झाली आहे.