हा रस्ता आहे का मोट्रोक्रॉस ट्रॅक

केळघर (जि. सातारा) : केळघर-मेढा रस्ता वाहतुकीस असुरक्षित होत असून, रस्त्याचे काम पूर्ण न झाल्याने अपघातांचे प्रमाण वाढणार आहे. 

सध्या विटा-महाबळेश्वर या रस्त्याच्या चारपदरी करण्याचे काम गतीने सुरू आहे. मात्र, हे काम सलगपणे न करता थोडे-थोडे केले जात आहे. केळघर ते मेढा दरम्यान केळघरच्या प्रवेशद्वारावर रस्ता एक बाजूने उकरलेला आहे. दुसरी बाजू डांबरीकरण केलेली आहे. मात्र, एक बाजूला पूर्णपणे रस्ता तसाच ठेवला आहे. त्यातच दोन दिवसांपासून पावसाला सुरुवात झाल्याने या रस्त्यावर दुचाकी चालवणे जिकिरीचे झाले आहे. या दोन दिवसांत केळघर गावच्या प्रवेशद्वारजवळ चार ते पाच दुचाकीस्वार घसरून पडले आहेत. रस्ता निसरडा व चिखलमय झाल्याने गाड्या घसरू लागल्या आहेत. 

वास्तविक ठेकेदाराने पावसाआधी रस्त्याचे काम निदान एका बाजूने तरी पूर्ण करणे आवश्‍यक होते. जवळजवळ अडीच महिने लॉकडाउन सुरू असल्याने केळघर हद्दीतील रस्त्याचे काम पूर्ण होणे गरजेचे होते. मात्र, ठेकेदार कूर्मगतीने काम करत असल्याने अपघातांना आयतेच निमंत्रण मिळत आहे. इतर ठिकाणी गतीने काम सुरू असतानादेखील केळघर ते आंबेघर हद्दीपर्यंत काम अपुरे असल्याने दुचाकी घसरण्याचे प्रमाण वाढू लागले आहे. एखादा गंभीर अपघात झाल्यावर ठेकेदाराचे डोळे उघडतील का, असा सवाल वाहनचालकांकडून उपस्थित होत आहे. 

ब्रेकिंग : वाईतील पेटकर कॉलनीत माेठी चाेरी; महिला गंभीर जखमी