सातारा : महाराष्ट्र राज्य परीक्षा परिषदेच्या वतीने घेतलेल्या शिष्यवृत्ती परीक्षेत सातारा जिल्ह्यातील विद्यार्थ्यांनी राज्याच्या गुणवत्ता यादीत उज्ज्वल यश मिळविले आहे. पूर्व उच्च प्राथमिक शिष्यवृत्ती परीक्षेत (पाचवी) जिल्ह्यातील ३५, तर पूर्व माध्यमिक शिष्यवृत्ती परीक्षेत (आठवी) २३ विद्यार्थी राज्य गुणवत्ता यादीत झळकले आहेत. वाईचा वेदांत राहुल घोडके हा विद्यार्थी ३०० पैकी २९० गुण मिळवीत राज्यात दुसरा आला आहे, तर जिल्हा गुणवत्ता यादीत जिल्ह्यातील ९४७ विद्यार्थी चमकले आहेत.