गोंदवल्यात 'राम नवमी'च्या थेट प्रक्षेपणावर कोरोना 'संकट'

गोंदवले (सातारा) : कोरोनाचा प्रादुर्भाव वाढत असल्याच्या पार्श्वभूमीवर गोंदवल्यातील थोरले श्रीराम मंदिरात होणारा श्रीराम जन्मोत्सव यंदाही साधेपणाने करण्यात येणार आहे. भाविकांनीही हा सोहळा घरीच साजरा करण्याचे आवाहन श्री ब्रह्मचैतन्य महाराज समाधी मंदिर समितीने केले आहे. "श्रीं'च्या समाधी मंदिरात विश्वस्तांच्या हस्ते गुढी उभारून श्रीराम नवमीच्या कार्यक्रमांना सुरुवात करण्यात आली.

श्रीरामभक्त श्री ब्रह्मचैतन्य महाराजांनी गोंदवल्यात श्रीराम मंदिरे स्थापिले आहेत. ही मंदिरे भाविकांची विशेष श्रद्धास्थाने असल्याने येथे दर वर्षी मोठ्या उत्साहात साजऱ्या होणाऱ्या श्रीराम नवमी उत्सवात भाविकांची मोठ्या संख्येने हजेरी असते. गोंदवल्याची वार्षिक यात्रा म्हणून या उत्सवाची ओळख आहे. कोरोनाच्या पार्श्वभूमीवर मात्र गेल्या वर्षीप्रमाणे यंदाही हा सोहळा रद्द करण्यात आला आहे. सध्या गोंदवल्यातील समाधी मंदिर भाविकांना दर्शनासाठी बंद आहे. गुढीपाडव्याच्या निमित्ताने समाधी मंदिरात केवळ पुजाऱ्यांच्या उपस्थितीत विश्वस्तांच्या हस्ते धार्मिक कार्यक्रम पार पडले.

हे पण वाचा- कुंभमेळ्याला सूट दिल्यानेच कोरोनाचा उद्रेक; पृथ्वीराज चव्हाणांचा मोदी सरकारवर घणाघात

सकाळी गुढी उभारून श्रीराम नवमीच्या कार्यक्रमांना सुरुवात करण्यात आली. येथील थोरले श्रीराम मंदिरात विधिवत पूजन करून अखंड नामस्मरण व पहारा बसविण्यात आला. या वेळी मंदिरात आकर्षक सजावट करण्यात आली होती. येत्या 21 एप्रिलला (बुधवार) श्रीराम जन्मोत्सव साजरा होणार आहे. मात्र, यंदाही हा सोहळा भाविकांविनाच करावा लागणार आहे. दरम्यान, सुरू झालेल्या या सोहळ्यात केवळ पुजाऱ्यांच्या उपस्थितीतच धार्मिक कार्यक्रम पार पाडले जातील. भाविकांनी आपापल्या घरीच श्रीरामनवमीचा सोहळा साजरा करावा, असे आवाहन समाधी मंदिर समितीने केले आहे.

Edited By : Balkrishna Madhale