Raju Shetti : ऊसदर आंदोलनाची साताऱ्यात ठिणगी; आक्रमक आंदोलकांनी ट्रॅक्टर दिला पेटवून

कऱ्हाड : सातारा जिल्ह्यातील साखर कारखान्यांनी ऊसदर जाहीर (Satara Sugarcane Rate Agitation) करावा, या मागणीसाठी स्वाभिमानी शेतकरी संघटनेचे अध्यक्ष माजी खासदार राजू शेट्टी (Raju Shetti) यांनी आज गुरुवारी आणि उद्या शुक्रवारी ऊसतोड बंद आंदोलन पुकारलं होतं. तरीही ऊस वाहतूक करणाऱ्या ट्रॅक्टरला मध्यरात्रीच्या सुमारास आग लावली. त्यामुळं आता सातारा जिल्ह्यात (Satara District) ऊसदर आंदोलनाची ठिणगी पडलीय.

याप्रकरणी उंब्रज पोलिसांनी (Umbraj Police) तक्रार दाखल करण्याची कार्यवाही सुरु केलीय. कोल्हापूर (Kolhapur), सांगली जिल्ह्यातील साखर कारखान्यांपेक्षा सातारा जिल्ह्यातील साखर कारखाने ऊसदर कमी देत आहेत. त्यामुळं स्वाभिमानी शेतकरी संघटना आक्रमक झालीय. स्वाभिमानी शेतकरी संघटनेचे नेते राजू शेट्टी यांनी गेल्या काही दिवसांपूर्वी सातारा जिल्ह्यात ठिकठिकाणी शेतकऱ्यांच्या बैठका घेवून १७ आणि १८ नोव्हेंबरला ऊसतोड आणि ऊस वाहतूक बंदचे आंदोलन पुकारले होते.

मात्र, तरीही इंदोली गावाजवळ उसानं भरलेल्या ट्रॅक्टर कारखान्याला ऊस वाहतूक करत असल्यानं अज्ञात आंदोलकांनी मध्यरात्री ट्रॅक्टरच पेटवला आहे. त्याची माहिती समजताच ऊंब्रज पोलिस घटनास्थळी दाखल झाले. त्यांनी पंचनामा केला असून या प्रकरणी गुन्हा दाखल करण्याची कार्यवाही सुरु असल्याचं पोलिसांनी सांगितलं. या घटनेमुळं सातारा जिल्ह्यात ऊसदर आंदोलनाची ठिणगी पडली असून आता हे आंदोलन वाढणार की काय अशी स्थिती निर्माण झालीय.