Koyna Dam : प्रमुख धरणांत फक्त 15.96 टीएमसी साठा; पाणी-विजेचं संकट, कोयनेतील विसर्ग होणार बंद

सातारा : जिल्ह्यातील प्रमुख धरणांनी तळ गाठल्याने जिल्हा प्रशासनाने धरणांतील पाणीसाठे राखीव केले आहेत. जिल्ह्यातील प्रमुख धरणांत केवळ १५.९६ टीएमसी उपयुक्त पाणीसाठा आहे. त्यामुळे धरणांतील पाणी पिण्यासाठी राखीव ठेवण्यात आले आहे.

कोयनेत (Koyna Dam) अकरा टीएमसी पाणीसाठा झाला, की विसर्ग पूर्णपणे बंद होणार आहे. त्याचा परिणाम वीज निर्मितीवर होण्याची शक्यता आहे. मॉन्सूनचे (Monsoon) आगमन आणखी लांबल्यास आगामी काळात नागरिकांना पाणीटंचाईचा सामना करावा लागणार आहे.

वादळ, एल निनोचा परिणामामुळे मोसमी पावसाचे आगमन लांबणीवर गेले आहे. निम्मा जून संपला तरी साधा झिरमिर पाऊस पडेना झाला आहे. त्यामुळे विहिरींच्या पाणीपातळीत कमालीची घट झाल्याने शेतकऱ्यांची चिंता वाढली आहे, तसेच जिल्ह्यातील प्रमुख धरणांतील पाण्याने तळ गाठल्याने आगामी काळात पाणी व वीज संकटाचा सामना जिल्ह्यातील नागरिकांना करावा लागण्याची भीती आहे.

मॉन्सूनचे आगमन वादळ व एल निनोच्या परिणामामुळे लांबणीवर पडले आहे. त्यामुळे पाणीटंचाई तीव्र होण्याची भीती आहे. प्रमुख धरणांत केवळ १५.९६ टीएमसी इतकाच उपयुक्त पाणीसाठा आहे. त्यामुळे सर्व धरणांतील पाणी पिण्यासाठी राखीव केले जाणार आहे. कोयनेत ११ टीएमसी पाणीसाठा झाल्यावर सर्व विसर्ग बंद होणार आहे. त्यामुळे याचा परिणाम वीजनिर्मितीवर होणार आहे.

तसेच नदीपात्रात असलेल्या पिण्याच्या योजनांना त्याचा फटका बसणार आहे. नदीकाठच्या गावांनी पाणी जपून वापरावे, असे आवाहन जिल्हा प्रशासनाने केले आहे. धरणनिहाय उपयुक्त साठा- (टीएमसीत) असा आहे : कोयना ६.०३, धोम २.०४, धोम- बलकवडी ०.६७, कण्हेर १.२७, उरमोडी २.९६, तारळी २.९९. येरळवाडी ०.१०, नेर ०.१६, मोरणा ०.४५, महू ०.७५.

धरणांतील पाणी टक्केवारी :

कोयना ६.०२, धोम १७.४१, धोम- बलकवडी १६.८८, कण्हेर १३.१८, उरमोडी ३०.७०, तारळी ५१.२७.