Chandrayaan - 3 : चंद्रावरील रहस्यांच्या शोधासाठी प्रज्ञान रोव्हरने सुरू केला प्रवास; इस्रोने शेअर केला Video

Chandrayaan - 3 : चांद्रयानाच्या लँडर मधून प्रज्ञान रोव्हर बाहेर पडले असून रोव्हर आता चंद्रावर फिरत आहे. लँडरमधील कॅमेऱ्यात रोव्हरचा प्रवास कैद झाला आहे. इस्रोने हा व्हिडिओ आपल्या अधिकृत ट्वीटर हँडलवर शेअर करत माहिती दिली आहे.

"प्रज्ञान रोव्हर दक्षिण ध्रुवावर चंद्राच्या रहस्यांचा शोध घेण्यासाठी शिवशक्ती पॉइंटभोवती फिरत आहे." असं कॅप्शन टाकून इस्रोने व्हिडिओ ट्वीट केला आहे. यामध्ये रोव्हर चंद्रावर फिरत असल्याचं दिसत आहे.

प्रज्ञान रोव्हर लँडरमधून खाली उतरतानाचा व्हिडिओ इस्रोकडून शेअर करण्यात आला होता. त्यानंतर आता रोव्हर चंद्रावर फिरत असून चंद्रावर असलेल्या मातीचे नमुने, मातीमध्ये असलेल्या पाण्याच्या प्रमाणाचा शोध, लँडरचे फोटो काढणे या गोष्टी करण्यात येणार आहेत.

दरम्यान, आज पंतप्रधान नरेंद्र मोदी यांना चांद्रयान मोहिमेत सहभागी असलेल्या सर्व शास्त्रज्ञांना बंगळुरू येथील इस्रो सेंटरमध्ये जाऊन शुभेच्छा दिल्या. यावेळी त्यांनी चांद्रयान - ३ ज्या ठिकाणी उतरले त्या ठिकाणाला शिवशक्ती असं नावंही दिले. त्याचबरोबर चांद्रयानाने ज्या दिवशी चंद्रावर सॉफ्ट लँडिंग केलं त्या दिवशी म्हणजे २३ ऑगस्टला राष्ट्रीय अंतराळ दिवस साजरा केला जाणार असल्याची मोठी घोषणा केली आहे.