ChatGPT Risks : चॅटजीपीटी मानवी आरोग्यास धोकादायक असल्याचं डॉक्टरांचं म्हणणं

ChatGPT Risks : चॅटजीपीटीच्या प्रभावामुळे आता डॉक्टरही घाबरलेत. कारण या ओपन एआयने विकसित केलेला चॅटबॉट चुकीची माहिती देत ​​असल्याचे अमेरिकेतील एका अभ्यासातून समोर आलंय. डॉक्टरांनी हे तंत्रज्ञान अत्यंत धोकादायक असल्याचं म्हटलंय.

ChatGPT ला ब्रेस्ट कॅन्सरबद्दल काही प्रश्न विचारण्यात आले होते, त्यातील काही चुकीचे होते. त्यामुळेच त्यांनी वैद्यकीय क्षेत्रात कृत्रिम बुद्धिमत्तेवर आधारित चॅटबॉट्सचा वापर न करण्याचा इशारा दिला आहे. चॅटजीपीटीची भीती सातत्याने वाढत असून आता डॉक्टरही याला धोकादायक मानत आहेत.

अमेरिकेच्या युनिव्हर्सिटी ऑफ मेरीलँड स्कूल ऑफ मेडिसिनच्या संशोधकांनी ChatGPT ला 25 प्रश्न विचारले. हे सर्व प्रश्न स्तनाच्या कर्करोगाच्या तपासणीसाठी सल्ला देण्यावर आधारित होते. संशोधकांनी प्रत्येक प्रश्न तीन वेगवेगळ्या वेळी विचारले. यानंतर मॅमोग्राफीचे प्रशिक्षण घेतलेल्या तीन रेडिओलॉजिस्टकडून रिझल्ट तपासण्यात आला.

88% उत्तरे बरोबर

चॅटजीपीटीने 88 टक्के उत्तरे बरोबर दिल्याचे निकालात स्पष्ट झालं असलं तरी हे प्रश्न सोपे होते. पण काही उत्तरे चुकीची तर होतीच पण काल्पनिकही होती. त्यामुळेच त्यांनी चॅटबॉट्सच्या वापरावर चिंता व्यक्त केली आहे. हे नवीन तंत्रज्ञान असल्याने संशोधकांनी लोकांना काळजी घेण्यास सांगितले आहे. याशिवाय, आरोग्याशी संबंधित कोणत्याही समस्येसाठी, केवळ डॉक्टरांचे मत घेण्याचा सल्ला दिला आहे.

डेलीमेलच्या वृत्तानुसार, ChatGPT ला मॅमोग्राम संबंधी प्रश्न विचारण्यात आला होता. यावर ChatGPT ने कोविड-19 लस घेतल्यानंतर चार ते सहा आठवड्यांनंतर मॅमोग्राम करवून घेण्याचा सल्ला दिला. मात्र, गेल्या वर्षीच हा सल्ला बदलण्यात आला असून आता महिलांनी याची वाट पाहण्याची गरज नाही.

ChatGPT ने स्तनाचा कर्करोग होण्याचा धोका आणि मेमोग्राम का करावे यासारख्या प्रश्नांची समान उत्तरे दिलेली नाहीत. चॅटबॉटने दिलेल्या उत्तरांमध्ये तफावत असल्याचे अभ्यासात आढळून आले. अभ्यासात सामील असलेल्या डॉ. पॉल यांच्या मते, ChatGPT काहीवेळा आपले दावे सिद्ध करण्यासाठी बनावट जर्नल वापरत असल्याची शक्यता आहे.

गुगल सर्चमुळे या प्रश्नांची अधिक ठोस उत्तरे मिळू शकतात, असा दावा या अभ्यासात करण्यात आला आहे. उत्तर तयार करण्यासाठी ChatGPT ने फक्त एकाच संस्थेचा अभ्यास पहिला आहे.