PM Narendra Modi : मोदींना भेटण्यासाठी येतायत इलॉन मस्क; भारतात मोठ्या गुंतवणुकीची शक्यता

Elon Musk in India : मागच्या अनेक वर्षांपासून भारतात पाय ठेवण्यासाठी इच्छूक असलेल्या टेस्लाचं स्वप्न पूर्ण होण्याची शक्यता आहे. केंद्र सरकारने काहीच दिवसांपूर्वी इलेक्ट्रिक वाहनांसाठी धोरण निश्चित केलं आहे. त्यातच आता टेस्ला कंपनीचे सीईओ इलॉन मस्क पंतप्रधान मोदींना भेटण्यासाठी भारतात येत असल्याची बातमी आहे.आपण भारतात पंतप्रधान मोदींच्या भेटीसाठी जात असल्याचं स्वतः इलॉन मस्क यांनी ट्वीट करुन सांगितलं.

इलेक्ट्रिक कार बनवणारी अमेरिकन कंपनी टेस्लाचे मुख्य कार्यकारी अधिकारी इलॉन मस्क याच महिन्यात भारतात येत आहेत. आपल्या भारत यात्रेदरम्यान ते पंतप्रधान नरेंद्र मोदी यांची भेट घेतील. सूत्रांच्या माहितीनुसार, या दौऱ्यामध्ये मस्क हे गुंतवणुकीसंदर्भात घोषणा करु शकतात. महिन्याच्या तिसऱ्या आठवड्यात होणाऱ्या दौऱ्यामध्ये टेस्ला कंपनीचे काही वरिष्ठ अधिकारी मस्क यांच्यासोबत भारत दौऱ्यावर येऊ शकतात, असंही सांगितलं जातंय.

मागच्या वर्षी जून महिन्यात इलॉन मस्क यांनी पंतप्रधान मोदींच्या अमेरिका दौऱ्यादरम्यान त्यांची भेट घेतली होती. त्यावेळी मस्क यांनी म्हटलं होतं की, त्यांनी २०२४ मध्ये भारत दौरा निश्चित केला आहे. सोबतच त्यांनी टेस्ला लवकरच भारतात पाय ठेवणार असल्याचं म्हटलं होतं.

टेस्ला कंपनी भारतात गुंतवणूक करण्यासाठी मागच्या अनेक वर्षांपासू इच्छूक आहे. परंतु टॅक्ससह इतर मुद्द्यांवर वाटाघाट्या प्रलंबित आहेत. मस्क यांच्या भारत दौऱ्यापूर्वीच केंद्र सरकारने एक नवीन इलेक्ट्रिक वाहन धोरण घोषित केलं आहे. त्याअंतर्गत किमान ५०० दशलक्ष गुंतवणुकीसह देशातील कंपन्याना आयात शुल्कामध्ये सवलत मिळणार आहे.