Elon Musk Wikipedia : 'विकिपीडियाचं नाव बदला, मी एक बिलियन डॉलर्स देईल', इलॉन मस्कची मोठी ऑफर!

जगातील सर्वात श्रीमंत व्यक्तींपैकी एक असणारे इलॉन मस्क हे आपल्या विचित्र स्वभावासाठी प्रसिद्ध आहेत. त्यांच्या डोक्यात कधी काय येईल हे सांगता येत नाही. आपल्या सोशल मीडिया हँडलवरुन ते कित्येक प्रकारच्या पोस्ट करत असतात. आता त्यांची अशीच एक एक्स (ट्विटर) पोस्ट चर्चेत आली आहे.

मस्क यांनी विकिपीडिया या वेबसाईटला तब्बल 1 अब्ज डॉलर्स देण्याची घोषणा केली आहे. अर्थात, यासाठी त्यांनी एक अटही ठेवली आहे. विकिपीडिया या वेबसाईटने आपलं नाव बदलून 'डिकीपीडिया' असं ठेवलं, तर आपण त्यांना एक अब्ज डॉलर्स देऊ असं मस्कने आपल्या पोस्टमध्ये म्हटलं आहे.

एका वर्षासाठी ठेवावं लागणार नाव

इलॉन मस्कच्या पोस्टनंतर नेटिझन्स विविध प्रकारच्या प्रतिक्रिया देत आहेत. एका व्यक्तीने म्हटलं, की विकिपीडियाने ही ऑफर घ्यायला हवी. पैसे मिळाल्यानंतर पुन्हा ते आपलं नाव बदलू शकतात. यावर इलॉन मस्कने आपली अट सांगितली. "किमान एक वर्षापर्यंत त्यांना हे नाव ठेवावं लागणार आहे. मी मूर्ख नाही." असा रिप्लाय मस्कने दिला आहे.

विकिपीडिया हा जगातील सर्वात मोठा मोफत माहितीचा स्त्रोत आहे. हा पूर्णपणे मोफत तर आहेच, शिवाय या वेबसाईटवर जाहिराती देखील नसतात. त्यामुळेच विकिपीडिया ऑपरेट करण्यासाठी भरपूर खर्च करावा लागतो. यासाठी कित्येक महिन्यांपासून ही वेबसाईट नेटिझन्सकडून वर्गणी मागत आहे.

याच वेळी इलॉनने दिलेली ऑफर ही पुढील कित्येक वर्षांपर्यंत विकिपीडिया कार्यरत ठेवण्यासाठी पुरेशी असणार आहे. त्यामुळेच कित्येक नेटिझन्स ही ऑफर विकिपीडियाने घ्यावी असं म्हणत आहेत.