Elon Musk Robot : इलॉन मस्कचा रोबोट घालतोय चक्क कपड्यांची घडी ! घरातल्या कामांमध्येही करू लागला मदत.. पाहा व्हिडिओ

Elon Musk Optimus Robot Video : इलॉन मस्कच्या टेस्ला कंपनीची एक डिव्हिजन ह्यूमॅनॉईड रोबोट्स देखील बनवत आहे. ऑप्टिमस नावाच्या या रोबोट्सना अगदी मानवाप्रमाणे हालचाल करण्यास, आणि घरातली कामं करण्यास शिकवलं जात आहे. मस्कचा हा रोबोट आता चक्क आपल्या कपड्यांची घडी करून देत असल्याचं एका नव्या व्हिडिओमध्ये दिसून येत आहे. (Tesla Robot)

इलॉन मस्कने आपल्या एक्स हँडलवरुन याचा व्हिडिओ शेअर केला आहे. यामध्ये ऑप्टिमस रोबोट एका बास्केटमधून टी-शर्ट बाहेर काढून, तो टेबलवर अगदी व्यवस्थित घडी घालून ठेवत आहे. हा व्हिडिओ सोशल मीडियावर मोठ्या प्रमाणात व्हायरल होतो आहे. (Optimus Robot Folding Laundry)

इलॉन मस्कने दुसऱ्या एका पोस्टमध्ये असंही म्हटलं आहे, की अद्याप हा रोबोट ऑटोमॅटिक पद्धतीने हे काम करू शकत नाही. मात्र, भविष्यात नक्कीच तो स्वतः हे काम करू शकेल. तसंच, भविष्यात हा रोबोट थेट दोरीवर वाळत घातलेले कपडे हातात घेऊन, थेट घडी घालून ठेऊ शकेल. म्हणजेच, त्याला कोणत्याही टेबल किंवा बास्केटची गरज भासणार नाही.

काय-काय करु शकतो ऑप्टिमस?

इलॉन मस्कने गेल्या वर्षी ऑप्टिमस रोबोटच्या सेकंड जनरेशनचा एक व्हिडिओ शेअर केला होता. यामध्ये हा रोबोट अगदी मानवाप्रमाणेच चालताना दिसत होता. फर्स्ट जनरेशनपेक्षा या रोबोटचं वजन 10 किलोने कमी केल्याचंही मस्कने स्पष्ट केलं होतं. यामुळे त्याच्या हालचाली आणखी जलद आणि सोप्या झाल्या होत्या.