Emergency Alerts : भारत-पाकिस्तानमध्ये तणाव! धोकादायक परिस्थितीत तुमच्या मोबाईलवर मिळणार अलर्ट, पटकन सुरू करून घ्या ही 1 सेटिंग

Emergency Alert feature in mobile : भारत-पाकिस्तानमधील वाढत्या तणावामुळे युद्धसदृश परिस्थिती निर्माण होण्याची शक्यता व्यक्त केली जात आहे. अलीकडेच झालेल्या पहलगाम हल्ल्यानंतर भारताने ‘ऑपरेशन सिंदूर’ अंतर्गत पाकिस्तानातील अनेक दहशतवादी तळ उद्ध्वस्त केले आहेत. अशा पार्श्वभूमीवर केंद्र सरकारने देशभरात आपत्कालीन परिस्थितीला तोंड देण्यासाठी सज्जता सुरू केली आहे.

आपल्या सुरक्षेसाठी सरकारकडून वेळोवेळी विविध प्रकारचे अलर्ट पाठवले जातात. मात्र, अनेकांना या अलर्टची माहिती मिळत नाही आणि त्यामुळे महत्त्वाचे इशारे दुर्लक्षित होतात. यामागचं एक मोठं कारण म्हणजे मोबाईलमध्ये ‘आपत्कालीन अलर्ट’ (Emergency Alerts) हे फीचर बंद असणं. जर हे फीचर आपल्या मोबाईलमध्ये सुरू नसेल, तर संकटांच्या वेळी सरकारचा अलर्ट तुमच्यापर्यंत पोहोचणारच नाही.

आपत्कालीन अलर्ट म्हणजे काय?

आपत्कालीन अलर्ट हे सरकारकडून पाठवले जाणारे विशेष प्रकारचे संदेश असतात, जे नैसर्गिक आपत्ती, हवाई हल्ला, क्षेपणास्त्र हल्ला, दहशतवादी हल्ला किंवा इतर गंभीर धोके ओळखल्यावर नागरिकांना सावध करण्यासाठी वापरले जातात. हे अलर्ट तुमच्या फोनवर मोठ्या आवाजात सायरनसह येतात, जे अंदाजे 60 सेकंदांपर्यंत सतत वाजत राहतात.

७ मे रोजी देशभरात मॉक ड्रिल

आज, ७ मे रोजी देशभरात मोठ्या प्रमाणात मॉक ड्रिल होणार असून, या वेळी लाखो स्मार्टफोनवर एकाचवेळी आपत्कालीन अलर्ट येण्याची शक्यता आहे. याचा उद्देश म्हणजे नागरिकांच्या सज्जतेची चाचणी घेणे आणि अलर्ट सिस्टीम योग्य प्रकारे कार्यरत आहे की नाही याची खात्री करणे.

तुमच्या मोबाईलमध्ये ही सेटिंग तपासा

जर तुम्हाला हे अलर्ट वेळेत मिळावे असं वाटत असेल, तर लगेचच तुमच्या मोबाईलमधील सेटिंग सुरू करून घ्या

1. सेटिंग्स (Settings) अ‍ॅप उघडा.

2. Safety & Emergency किंवा Security & Location हा पर्याय शोधा. (फोनच्या ब्रँडनुसार नाव थोडं वेगळं असू शकतं.)

3. Wireless Emergency Alerts किंवा Emergency Alerts वर टॅप करा.

4. येथे Allow Alerts, Test Alerts, आणि Severe Threats सारखे पर्याय असतील, ते सर्व ‘On’ करा.

युद्धसदृश स्थिती उद्भवल्यास केवळ सैन्यच नव्हे तर सामान्य नागरिकांचीही सज्जता अत्यंत महत्त्वाची ठरते. अशा वेळी आपला स्मार्टफोन केवळ संवादाचे साधन न राहता, जीव वाचवणारे साधन ठरू शकतो. त्यामुळे तत्काळ वरील सेटिंग तपासा आणि आपत्कालीन परिस्थितीत आवश्यक ती माहिती वेळेवर मिळवण्याची खात्री करा.