Mobile Hacking : OTT अ‍ॅप्स डाऊनलोड करताना खबरदारी गरजेची; नवीन मालवेअर करतोय अँड्रॉईड मोबाईलवर हल्ला! सरकारचा इशारा

केंद्र सरकारने देशभरातील अँड्रॉईड यूजर्सना एक इशारा दिला आहे. एक अ‍ॅडव्हान्स मालवेअर अटॅक सध्या भारतातील कित्येक मोबाईलवर हल्ला करत आहे. ओटीटी अ‍ॅप्सच्या माध्यमातून हा मालवेअर फोनमध्ये येत असल्याचं सरकारने स्पष्ट केलं आहे.

यामुळेच सरकारने देशातील स्मार्टफोन यूजर्सना खबरदारीचा इशारा दिला आहे. नवीन अ‍ॅप डाऊनलोड करताना किंवा इंटरनेट सर्फ करत असताना काळजी घेण्याचं आवाहन देखील सरकारने केलं आहे.

कोणता आहे मालवेअर?

सुरक्षा मंत्रालयाच्या एका विभागाने याबाबत अ‍ॅडव्हायजरी जारी केली आहे. DogRAT नावाचा हा एक रिमोट अ‍ॅक्सेस ट्रोजन मालवेअर असल्याचं स्पष्ट करण्यात आले आहे. हा मालवेअर आपल्या फोनमध्ये आल्यास आपले बँकिंग क्रेडेन्शिअल्स, फोटो, कीस्ट्रोक्स (तुम्ही जे टाईप करता तो डेटा), मेसेज आणि इतर बरीच माहिती चोरू शकतो. सोबतच तुम्हाला ट्रॅक करून, तुमचा ऑडिओ देखील रेकॉर्ड करू शकतो असं सरकारने सांगितलं आहे.

फेक अ‍ॅप्सच्या माध्यमातून हल्ला

हा मालवेअर व्हॉट्सअ‍ॅप, चॅटजीपीटी, ऑपेरा मिनी ब्राऊजर, नेटफ्लिक्स, यूट्यूब अशा कित्येक अ‍ॅप्सच्या माध्यमातून आपल्या स्मार्टफोनमध्ये येऊ शकतो. अशा अ‍ॅप्सचे फेक व्हर्जन तयार करुन, त्या माध्यमातून यूजर्सच्या फोनवर हल्ला करण्याचे प्रकार समोर आल्याचं सरकारने सांगितलं आहे.

काय घ्यावी खबरदारी

मोबाईलमध्ये व्हायरस किंवा मालवेअर येऊ नये यासाठी नवीन अ‍ॅप्स घेताना केवळ प्ले-स्टोअरवरुन घेणं गरजेचं आहे. इतर वेबसाईटवरुन किंवा थर्ड पार्टी प्लॅटफॉर्मवरून अ‍ॅप्स घेणं टाळावं. तसंच आपल्या फोनचं सॉफ्टवेअर कायम अपडेट ठेवावं. आपल्या मोबाईल किंवा अन्य डिव्हाईसमध्ये अँटीव्हायरस सॉफ्टवेअर घेतल्यास देखील सायबर हल्ल्यापासून बचाव होऊ शकतो.