Sahara Desert : सहारा वाळवंटाच्या जागी एकेकाळी होतं घनदाट जंगल; अचानक कुठे झालं गायब? वैज्ञानिकांनी लावला शोध

Forest in Sahara : सहारा हे जगातील सर्वात मोठं वाळवंट म्हणून ओळखलं जातं. आफ्रिका खंडात असणारं हे वाळवंट 9,400 वर्ग मैल एवढं पसरलं आहे. मात्र, या वाळवंटाच्या जागी एके काळी घनदाट जंगल होतं, असं तुम्हाला कुणी सांगितलं तर?

ऐकायला खरं वाटत नसलं. तरी हे पूर्णपणे सत्य आहे. या वाळवंटाच्या ठिकाणी एके काळी घनदाट जंगले आणि प्राणी होते. तसंच याठिकाणी मानवी वस्तीदेखील होती असं संशोधकांनी म्हटलं आहे. या ठिकाणी मोठे तलाव देखील होते, असंही रिसर्चमध्ये समोर आलं आहे.

वैज्ञानिकांनी सांगितलं, की हे सगळं सहा हजार वर्षांपूर्वी अस्तित्वात होतं. नॅशनल जिओग्राफिक चॅनलने याबाबत एक रिपोर्ट देखील प्रसिद्ध केला आहे. शिकागो विद्यापीठाच्या संशोधकांच्या एका पथकाने हा मोठा शोध लावला होता.

कसा लागला शोध?

शिकागो विद्यापीठाचं हे पथक दक्षिण-पूर्व अल्जेरियामध्ये डायनासॉरच्या अवशेषांचा शोध घेत होती. यावेळी त्यांना कित्येक मानवी हाडांचे सांगाडे आणि इतर प्राण्यांचे सांगाडेही मिळाले. विशेष म्हणजे, याठिकाणी मासे आणि मगर अशा जीवांचे अवशेष देखील मिळाले. वाळवंटाजवळ अशा प्राण्यांचे अवशेष मिळाल्यामुळे वैज्ञानिकांनी याबाबत अधिक संशोधन केलं.

मानवांचे दोन समूह

अधिक संशोधनात असं दिसून आलं, की सहारा वाळवंटाच्या ठिकाणी मानवांचे किफियन आणि टेनेरियन असे दोन समूह राहिले आहेत. किफियन समूह हा इसवी सन पूर्व 7,700 ते 6,200 दरम्यान याठिकाणी राहत होते. तर, टेरेनियन समूह हा इसवी सन पूर्व 5,200 ते 2,500 सालापर्यंत याठिकाणी राहत होते.

कशामुळे झालं वाळवंट?

इतिहास आणि हवामान संशोधकांनी दिलेल्या माहितीनुसार, सहारा वाळवंट हे शेकडो वर्षांच्या कालावधीत तयार झालं आहे. पृथ्वीच्या कक्षेत झालेल्या बदलामुळे याठिकाणचं हवामान बदललं. त्यामुळे याठिकाणी हळू-हळू वाळवंट तयार होत गेलं असं मानलं जातं. सोबतच, याला ग्लोबल वॉर्मिंग - म्हणजेच जागतिक तापमानवाढ देखील कारणीभूत असल्याचं म्हटलं जातं.