Sun Halo : जगभरात ठिकठिकाणी दिसला 'हेलो इफेक्ट'; सूर्याभोवती कशामुळे तयार होतं हे रिंगण? जाणून घ्या

जगामध्ये कित्येक अद्भुत घटना घडत असतात. काही दिवसांपूर्वीच आपण 'सूपर ब्लू-मून'चा आनंद घेतला. त्यानंतर गुरुवारी आणि शुक्रवारी जगभरात ठिकठिकाणी 'हेलो इफेक्ट' पाहायला मिळाला. यामध्ये सूर्याच्या भोवती इंद्रधनुष्याप्रमाणे एक रिंगण तयार होतं.

केवळ भारतातच नाही, तर जगभरातील कित्येक देशांमध्ये काल आणि आज हा अद्भुत नजारा पहायला मिळाला. लोकांनी सूर्याभोवती असणाऱ्या या रिंगचे फोटो काढून सोशल मीडियावर शेअर केले. या घटनेला 'सन हेलो' किंवा 'सोलार हेलो' असंही म्हटलं जातं.

कशामुळे तयार होतो 'सन हेलो'?

ही खरंतर एकदम साधारण घटना आहे. वातावरणात असणाऱ्या हेक्सागोनल क्रिस्टलमुळे असं होतं. वातावरणातील पाण्याच्या षटकोनी कणांवर जेव्हा सूर्यप्रकाश पडतो, तेव्हा त्यातून होणाऱ्या रिफ्रॅक्शनमुळे असा इफेक्ट दिसतो.

दुर्मिळ असतात घटना

'हेलो' म्हणजे प्रकाशाने किंवा एनर्जीने तयार झालेली एखादी गोलाकार आकृती. यामुळेच या घटनेला 'सन हेलो' म्हणतात. अशी घटना घडण्यासाठी सूर्याचा पृथ्वीशी एक विशिष्ट कोन (22 डिग्री) असणंही गरजेचं असतं. यासोबतच हवेत पुरेशी आद्रता असणंही आवश्यक असतं. यामुळेच या घटना अगदी दुर्मिळ असतात.