Buying a used smartphone: जुना फोन खरेदी करताय? 'या' गोष्टी तपासा, अन्यथा होईल नुकसान

Guide To Buying Second Hand Phones: अनेकांना दमदार फीचर्ससह येणारा महागडा फोन खरेदी करायचा असतो. परंतु, बजेट कमी असल्याने फ्लॅगशिप स्मार्टफोन खरेदी करणे शक्य होत नाही. अशावेळी अनेकजण जुना स्मार्टफोन खरेदी करण्याला प्राधान्य देतात. मात्र, जुना फोन खरेदी करताना विशेष खबरदारी घेणे गरजेचे आहे.

जुना फोन खरेदी करताना काही गोष्टींकडे विशेष लक्ष न दिल्यास तुमचे मोठे नुकसान होऊ शकते. त्यामुळे जुना फोन खरेदी करताना कोणत्या गोष्टींकडे लक्ष द्यायला हवे, त्याविषयी सविस्तर जाणून घ्या.

फोन खरेदी करण्याआधी वापरून पाहा

जुना फोन आपल्याला खूप कमी किंमतीत मिळत असतो. अशावेळी आपण फोन न तपासताच खरेदी करतो. मात्र, फोन न तपासता खरेदी केल्यास तुमचे मोठे नुकसान होऊ शकते. जुना फोन खरेदी करायला गेल्यास तो वापरून पाहा. कमीत कमी १५ मिनिटात त्यातील अ‍ॅप्स ओपन करून पाहा. तसेच, प्रोसेसिंग पॉवर, फ्रेम रेट, टच स्क्रीन, हँगिंग प्रॉब्लम, बॅटरी हिटिंग आणि कॅमेरा परफॉर्मेंस देखील नक्की पाहा.

फोन विकणाऱ्याला भेटा

तुम्ही जर जुना फोन खरेदी करायला जात असल्यास विक्री करणाऱ्याची नक्की भेट घ्या. अनेकदा फोन विकताना सांगितलेल्या गोष्टी खोट्या असण्याची शक्यता असते. त्यामुळे तुम्ही स्वतः त्या व्यक्तीची भेट घेऊन सर्व गोष्टी तपासून पाहू शकता.

फोनचे पार्ट्स तपासा

फोन खरेदी करण्याच्या गडबडीत आपण अनेक गोष्टींकडे दुर्लक्ष करतो. मात्र, खरेदी करताना जुन्या फोन्सचे पार्ट्स नक्की पाहा. स्क्रीन, फोनच्या बॉडीवर कोणतेही स्क्रॅच तर नाही हे पाहा. याशिवाय पोर्ट, माइक, स्पीकर आणि कॅमेरा सारख्या गोष्टींकडे विशेष लक्ष द्या. हे पार्ट्स व्यवस्थित काम करत नसल्यास फोन वापरताना मोठे नुकसान होऊ शकते.

बिल नक्की घ्या

सेकंड हँड फोन खरेदी करताना फोनचे इनवॉइस बिल आणि रिटेल बॉक्स घ्यायला विसरू नका. बिल दिल्यास त्यावरील IMEI Number आणि फोनचा IMEI नंबर नक्की पाहा. फोनचा IMEI नंबर जाणून घेण्यासाठी *#06# डायल करा.