Aadhar QR App : घरबसल्या काही मिनिटांत करा आधार अपडेट! UIDAI च्या नव्या QR कोड बेस्ड अ‍ॅपची एन्ट्री, कसं वापरायचं? पाहा एका क्लिकवर..

आधार कार्डशी संबंधित महत्त्वाची बातमी समोर आली आहे. भारतीय विशिष्ट ओळख प्राधिकरण (UIDAI) लवकरच एक नवं QR कोड बेस्ड अ‍ॅप लाँच करणार असून, याद्वारे आधार कार्ड अपडेट करण्याची प्रक्रिया अत्यंत सोपी आणि जलद होणार आहे. विशेष म्हणजे, या अ‍ॅपद्वारे नागरिकांना घरबसल्या केवळ काही मिनिटांतच आधार अपडेट करता येणार आहे.

आजवर नागरिकांना पत्ता, मोबाईल नंबर, जन्मतारीख यांसारख्या माहितीमध्ये दुरुस्ती करण्यासाठी आधार सेवा केंद्रात जावे लागत होते. मात्र, UIDAI च्या या नव्या अ‍ॅपमुळे ही गरज पूर्णपणे संपणार आहे. आता मोबाईल अ‍ॅपच्या माध्यमातून तुम्ही घरबसल्या ही सर्व माहिती अपडेट करू शकाल.

अ‍ॅपमध्ये काय असणार खास?

UIDAI चं हे नवं अ‍ॅप QR कोड बेस्ड असून, यामध्ये अनेक नवे फिचर्स असणार आहेत:

• QR कोडद्वारे डिजिटल आधार शेअर करण्याची सुविधा

• फोटोकॉपीची गरज नाही, डिजिटल डॉक्युमेंट्सवरच काम

• Masked Aadhaar शेअर करता येणार

• App-to-App आधार ट्रान्सफर ची सुविधा

• हॉटेल, ट्रेन किंवा कोणत्याही सेवा पुरवठादाराला त्वरित आधार ऑथेंटिकेशन

नोव्हेंबर 2025 पासून नवी सुविधा पूर्णपणे कार्यान्वित

UIDAI कडून मिळालेल्या माहितीनुसार, नोव्हेंबर 2025 पासून हे अ‍ॅप पूर्ण क्षमतेने कार्यान्वित होणार आहे. त्यानंतर नागरिक घरबसल्या पत्ता, नाव, बायोमेट्रिक माहिती, मोबाईल नंबर अशा सर्व बाबी अपडेट करू शकतील.

इतर कागदपत्रांशी लिंक होणार

या नव्या प्रणालीत आधारला इतर महत्त्वाच्या कागदपत्रांशी लिंक करण्याचाही पर्याय असणार आहे. यात जन्म प्रमाणपत्र, मॅट्रिक सर्टिफिकेट, ड्रायव्हिंग लायसन्स, पासपोर्ट, पॅन कार्ड यांचा समावेश आहे. एवढंच नाही तर, वीज बिलाची माहिती देखील जोडण्याची तयारी UIDAI करत आहे.

संपूर्ण आधार अपडेट प्रक्रिया केवळ काही मिनिटांत पूर्ण होईल, असा दावा UIDAI ने केला आहे. त्यामुळे लांबच लांब रांगा, प्रतीक्षा, आणि वेळ वाया जाणं हे सगळं आता भूतकाळात जमा होणार आहे.

ही नवी सुविधा सुरू झाल्यानंतर आधार संबंधित व्यवहार अधिक सुरक्षित, सुलभ आणि वेगवान होतील. UIDAI चं हे अ‍ॅप डिजिटल भारताच्या दिशेने एक महत्त्वाचं पाऊल ठरणार आहे.