World Motorcycle Day : आजच्याच दिवशी का साजरा होतो जागतिक मोटारसायकल दिन? अगदी मजेशीर आहे कारण

२१ जून हा दिवस जगभरात मोटारसायकल दिन म्हणून साजरा केला जातो. रस्त्यांवर फिरण्याचे स्वातंत्र्य वाढवण्यासाठी हा दिवस (World Motorcycle Day) साजरा केला जातो. ज्यांना बाईक्सचं वेड आहे, आणि त्यासंबंधी क्षेत्रात जे काम करतात अशा लोकांसाठी हा अगदी महत्त्वाचा दिवस आहे. जगभरातील कित्येक बाईकर्स ग्रुप हा दिवस अतिशय उत्साहाने साजरा करतात.

केवळ दैनंदिन गरजांसाठीच नाही, तर मजा म्हणूनही लोक बाईक रायडिंगचा आनंद घेतात. भारतातही असे बरेच बाईक ग्रुप्स आहेत. बुलेट किंवा अन्य बाईक्सवर लडाखला जाणं हे भारतातील प्रत्येक रायडरचं स्वप्न असावं.

जगातील पहिली बाईक

पॅरिसमध्ये १८६० साली पिएरे मिचौक्स नावाच्या व्यक्तीने जगातील पहिली मोटारसायकल बनवली होती. या गाडीचं इंजिन वाफेवर चालणारं होतं. यानंतर कित्येक वर्षं अशाच प्रकारच्या गाड्या बनवल्या जात होत्या. १८८५ मध्ये मात्र इंटर्नल कम्बश्चन इंजिन असणारी मोटारसायकल बनवण्यात आली. यानंतर बाईक्सची प्रसिद्धी आणखीच वाढली.

महायुद्धांच्या काळात बाईक्सचा भरपूर वापर करण्यात आला. विशेषतः वेगाने संदेशवहन करण्यासाठी मोटारसायकल वापरली जात. १८९४ मध्ये बाईक्सचं मोठ्या स्तरावर उत्पादन सुरू झालं. त्यानंतर पुढच्या शतकात मोटारसायकलचा मोठ्या प्रमाणात वापर सुरू झाला.

आजचा दिवस का?

मोटारसायकल दिन (Motorcycle Day 2023) म्हणून २१ जून या दिवसाची निवड करण्यामागे एक मजेशीर कारण आहे. २१ जून हा वर्षातील सर्वात मोठा दिवस असतो. त्यामुळे आज दिवस हा सुमारे १३ तासांचा असतो. यामुळे रायडर्सना बाईक चालवण्यासाठी दिवसाचा अधिक वेळ मिळतो. यामुळेच मोटारसायकल दिन म्हणून आजचा दिवस साजरा केला जातो.

काळजी महत्त्वाची

मोटारसायकल दिन साजरा करण्याची सगळ्यात योग्य पद्धत म्हणजे, तुमची बाईक बाहेर काढून एक चक्कर मारून येणं. यासाठी तुम्ही सोलो राईडवर जाऊ शकता, किंवा आपल्या मित्रांसोबतही कुठेतरी फिरून येऊ शकता. मात्र, हे करताना वाहतुकीच्या नियमांचे पालन करणे गरजेचे आहे. तसेच, सुरक्षेसाठी हेल्मेट आणि इतर इक्विपमेंट्स वापरणंही गरजेचं आहे.