MPSC Economics Study Material
esakal
लेखक : श्रीकांत जाधव
MPSC राज्यसेवा मुख्य परीक्षा २०२५ साठी सामान्य अध्ययन पेपर ३ (GS 3) मधील अर्थशास्त्र हा विषय अत्यंत निर्णायक आहे. नवीन वर्णनात्मक (Descriptive) स्वरूपामुळे आता केवळ वस्तुनिष्ठ माहिती पाठ करून चालणार नाही, तर विषयाचे सखोल आकलन आणि विश्लेषणात्मक मांडणी आवश्यक आहे. या विषयाची तयारी करताना खालील रणनीती उपयुक्त ठरू शकते.
अर्थशास्त्राची तयारी सुरू करताना सर्वात प्रथम आयोगाचा सुधारित अभ्यासक्रम नीट समजून घेणे गरजेचे आहे. यामध्ये भारतीय अर्थव्यवस्था, शासकीय वित्तव्यवस्था, समावेशक विकास आणि कृषी अर्थशास्त्र यांसारख्या मुद्द्यांवर विशेष भर देण्यात आला आहे. तयारीची सुरुवात करताना इयत्ता ११ वी आणि १२ वीची NCERTची पुस्तके तसेच राज्य पाठ्यपुस्तक मंडळाची पुस्तके वाचणे अनिवार्य आहे. यामुळे मूलभूत संकल्पना, जसे की जीडीपी, राजकोषीय तूट आणि चलनवाढ, यांमधील परस्पर संबंध स्पष्ट होतात. संकल्पना स्पष्ट असल्या की उत्तर लिहिताना भाषेचा ओघ कायम राहतो.