धक्कादायक! एअर इंडियाच्या विमानात प्रवाशाच्या जेवणात आढळलं ब्लेड! विमान कंपनीनं मान्य केली चूक

नवी दिल्ली : एअर इंडियाच्या विमानात उड्डाणादरम्यान प्रवाशाच्या जेवणात ब्लेड आढळल्यानं खळबळ उडाली आहे. विशेष म्हणजे विमान कंपनीनं आपल्या स्टाफची ही चूक मान्य केली आहे. आंतरराष्ट्रीय उड्डाणावेळी अर्थात बंगळुरु ते सॅन फ्रान्सिस्कोकडं जाणाऱ्या विमानात हा प्रकार घडला आहे. (Air India passenger finds metal blade in meal)

एअर इंडियाचे मुख्य ग्राहक अनुभव अधिकारी राजेश डोग्रा यांनी या प्रकरणी निवेदन दिलं आहे. त्यांनी म्हटलं की, "एअर इंडियानं हे कन्फर्म केलं आहे की, आमच्या एका उड्डाणावेळी एका प्रवाशाच्या जेवणात अखाद्य पदार्थ आढळून आला आहे. पण चौकशीनंतर लक्षात आलं की, आमच्या केटरिंग पार्टनर कंपनीनं भाज्या कापण्यासाठी वापरणाऱ्या प्रोसेसिंग मशिनचं ते ब्लेड आहे. चुकून ते जेवणात पडलं आणि तसंच पॅकिंगही झालं"

दरम्यान, आमच्या केटरिंग पार्टनर कंपनीकडून पुन्हा अशा प्रकारची चूक होऊ नये यासाठी आम्ही चांगल्या उपाययोजना करण्यासाठी काम करत आहोत. यामध्ये जेवण बनवण्याच्या प्रक्रियेची अधिववेळा तपासणीचा समावेश करण्यात आला आहे, असंही राजेश डोग्रा यांनी आपल्या निवदेनात म्हटलं आहे.