Video Viral : व्वा रे पठ्ठ्या...; चौथा थरावरून दोघांना खांद्यावर घेत गोविंदाने मारल्या 20 बैठका

गोपाळकाला निमित्त राज्यभरात आणि देशभरात दहिहंडी उत्सव पार पडला. यावेळी गोविंदांनी थर लावून हंडी फोडल्या. राज्यभरातील दहीहंडी उत्सवामध्ये झालेल्या दुर्घटनेत एका गोविंदाचा मृत्यू झाला असून अनेकजण जखमी झाले आहेत. तर सध्या एक व्हिडिओ समोर आला असून त्यामध्ये एक गोविंदा चौथ्या थरावर बैठका मारताना दिसत आहे.

व्हायरल झालेला व्हिडिओ दहिहंडी उत्सवातील असून त्यामध्ये गोविंदांनी तब्बल सहा थर लावलेले दिसत आहेत. खाली अनेक गोविंदा त्यांच्या संरक्षणासाठी उभे असलेले दिसत असून त्यामध्ये चौथ्या थरावर असलेला एक गोविंदा आपल्या खांद्यावर दोन गोविंदांना घेऊन २० बैठका मारत आहे.

दरम्यान, यावेळी सर्व भाविक श्वास रोखून या प्रकाराकडे पाहत आहेत. हा खेळ साहसी वाटत असला तरी तेवढाच धोकादायक आहे. गोविंदांच्या संरक्षणासाठी नीट व्यवस्था या ठिकाणी केलेली दिसत नाही. तर एका गोविंदाच्या खांद्यावर दोन गोविंदा उभे असताना त्याने वीस बैठका मारणे हे धोकादायक आहे.

आयोजक आणि गोविंदांनी सुद्धा दहिहंडी उत्सावावेळी आपल्या जीवाची आणि आपल्या संघाच्या सुरक्षेची काळजी घेणे गरजेचे आहे.