ऐकलंत का तळीरामांनो...उद्यापासून मद्याची दुकाने सुरु होणार बरं का!

नाशिक : कोरोना विषाणूमुळे गेल्या दीड महिन्यांपासून बंद असलेली मद्यविक्री दुकाने पुन्हा सुरू होण्याचा मार्ग बुधवारी (ता. 6) मोकळा झाला आहे. जिल्हाधिकाऱ्यांनी नव्याने काढलेल्या आदेशानुसार शुक्रवार (ता. 8)पासून विक्रीस सुरवात होणार आहे. परवानाधारक सकाळी दहा ते दुपारी चारपर्यंत मद्याची विक्री करू शकणार आहेत. 

हमीपत्रदेखील देणे बंधनकारक असणार

कोरोनाचा प्रादुर्भाव रोखण्यासाठी गेल्या दीड महिनाभर मद्याची दुकाने बंद होती. सोमवारी (ता. 4) दारूची दुकाने उघडण्यात आली होती; परंतु नियमांचे उल्लंघन आणि तळीरामांची गर्दी यामुळे विक्रेत्यांवर अवघ्या दोन तासांत दुकाने बंद करण्याची नामुष्की ओढावली होती. त्यामुळे असा प्रकार टाळण्यासाठी एक्‍साइजने आता टोकन अथवा कूपनचा पर्याय निवडल्याची चर्चा होती. मात्र आता जिल्हाधिकाऱ्यांनी नव्याने काढलेल्या आदेशात मालेगाव महापालिका, शहरातील कंटेन्मेंट झोन, तसेच महापालिका, नगर परिषद हद्दीतील मॉल्स, बाजार संकुल आणि बाजारातील मद्यविक्रीची दुकाने वगळून उर्वरित भागातील दुकाने सुरू राहण्यास परवानगी देण्यात आली आहे. विक्रेत्यास यासाठी जिल्हाधिकाऱ्यांनी घालून दिलेल्या सर्व नियम व अटींचे पालन करावे लागणार आहे. या सूचनाचे पालन होईल, असे हमीपत्रदेखील देणे बंधनकारक असणार आहे. यांसह शासनाने घालून दिलेल्या नियामांचा फलक हा दुकानाच्या दर्शनी भागात लावण्याचे आदेशदेखील या वेळी देण्यात आलेले आहेत. नियमांचे पालन न करणाऱ्या विक्रेत्यांवर कडक कारवाई केली जाणार आहे. 

हेही वाचा > वाह! पोलिसदादा मनचं जिंकलं की हो...वेळप्रसंगी फावडं घेऊन थेट लागले कामाला!

मद्यविक्रीस असलेल्या सूचना 

- दुकानासमोर एकाच वेळी पाचपेक्षा अधिक ग्राहक असता कामा नये. 
- प्रत्येक ग्राहकांमध्ये किमान सहा फुटांचे अंतर ठेवावे. त्यासाठी सहा फुटांवर वर्तुळ आखावेत. 
- खरेदीकरिता येणाऱ्या प्रत्येक ग्राहकाचे थर्मल स्कॅनिंग करावे. 
- दुकान व सभोवतालचा परिसर दर दोन तासांनी निर्जंतुकीकरण करावा. मास्क, हॅन्डग्लोजचा वापर करावा. 
- ग्राहकांमध्ये सोशल डिस्टन्सिंग ठेवण्याकरिता सुरक्षारक्षकाची नेमणूक करावी.  

हेही वाचा > अचानक आगीच्या ज्वाला आकाशात उठल्या...सगळ्यांचाच उडाला थरकाप!