कोरोनाच्या पार्श्‍वभूमीवर ई-पॉसला जूनअखेरपर्यंत मुदतवाढ - छगन भुजबळ

नाशिक : कोरोनाच्या पार्श्‍वभूमीवर ई-पॉसला जूनअखेरपर्यंत मुदतवाढ देण्यात आली. नागरिकांना अन्नधान्य वाटपाची जबाबदारी रेशन दुकानदारांवर आहे. 23 मार्च ते 31 मे या काळात धान्यवाटपातील अनियमितता, नियमांचे पालन न केलेल्या राज्यातील 483 रेशन दुकानांचे निलंबन तसेच 322 दुकानांचे परवाने रद्द, 93 दुकानदारांची 100 टक्के अनामत रक्कम जप्त अशी माहिती राज्याचे अन्न व नागरी पुरवठामंत्री छगन भुजबळ यांनी मंगळवारी (ता. 2) दिली. 

वितरण व्यवस्थेवर काटेकोरपणे लक्ष

श्री. भुजबळांच्या अध्यक्षतेखाली मंत्रालयात विभागाची आढावा बैठक झाली. सचिव संजय खंदारे, वैधमापनशास्त्र विभागाचे नियंत्रक आणि गृह विभागाचे प्रधान सचिव अमिताभ गुप्ता, मुंबई रेशनिंगचे नियंत्रक कैलास पगारे, अन्न व नागरी पुरवठा सहसचिव मनोजकुमार सूर्यवंशी, सहसचिव सतीश सुपे, चारुशीला तांबेकर आदी उपस्थित होते. जूनचे अन्नधान्य वितरण, रेशनकार्ड नसलेल्यांसाठी धान्य वितरण, रेशन दुकानदारांसाठी विमा, सार्वजनिक वितरण व्यवस्थेतून खाद्यतेल-भरडधान्य वितरणाची नवीन योजना तयार करणे, तूरडाळ-हरभराडाळ नियतन, शिवभोजन योजना आदींबाबतचा आढावा बैठकीत घेण्यात आला. नागपूर, अमरावती, औरंगाबाद, नाशिक, पुणे व कोकण या महसूल विभागाच्या जोडीला मुंबई शहरात लॉकडाउनच्या काळात कारवाई करण्यात आली आहे. राज्यातील या वितरण व्यवस्थेवर अन्न व नागरी पुरवठा विभागातर्फे काटेकोरपणे लक्ष ठेवण्यात आले असून, पथकांच्या माध्यमातून ही कारवाई करण्यात येत आहे, असे श्री. भुजबळ यांनी या वेळी सांगितले. 

हेही वाचा > 'मी नाही, माझ्यातल्या खेळाडूने केले कोरोनाला क्लिन बोल्ड!'

विभागनिहाय दुकानांवरील कारवाई
 
नागपूर -- 78 दुकाने निलंबित, 13 परवाने रद्द 
अमरावती -- 22 दुकाने निलंबित, 32 परवाने रद्द 
औरंगाबाद -- 71 दुकाने निलंबित, 6 परवाने रद्द 
नाशिक -- 61 दुकाने निलंबित, 73 परवाने रद्द 
पुणे -- 195 दुकाने निलंबित, 183 परवाने रद्द 
कोकण -- 31 दुकाने निलंबित, 7 परवाने रद्द 
मुंबई शहर -- 25 दुकाने निलंबित, 8 परवाने रद्द  

हेही वाचा > कोरोनापेक्षा बदनामीच्या विषाणूशी 'तो' वेदनादायक संघर्ष...पण, आम्ही लढलोच!