आता तर हद्दच झाली! खामखेड्याला तब्बल आठ क्विंटल कांदा रात्रोरात्र लांबविला; शेतकरी हवालदिल

खामखेडा (नाशिक) : देवळा तालुक्यात कांदाचोरीचे सत्र वाढल्याने कांदा उत्पादक शेतकरी हैराण आहेत. तीन-चार दिवसांतील देवळा तालुक्यातील वाजगाव व वाखारी येथील कांदाचोरीच्या घटना ताज्या असतानाच शनिवारी (ता.३१) खामखेडा येथे कांदाचोरीची घटना समोर आली. यामुळे कांदा उत्पादक शेतकरी धास्तावले आहेत. 

कांदा चाळीतून भरलेल्या पाट्यांसहित रात्री लंपास

बाजारात कांद्याचे दर वाढल्याने साठवण केलेल्या कांदाचोरीच्या घटनेत आठवडाभरात वाढ झाली आहे. खामखेडा येथील शेतकरी आबाजी शेवाळे यांच्या खामखेडा गावाच्या बुटीरान भागातील कालव्याला लागून असलेल्या (गट नं २१२) कांदाचाळीत चांगला भाव मिळेल, या अपेक्षेने ६०० क्विंटल कांदा साठवून ठेवला होता. त्यातील काही कांदा बाजारात विक्री केला होता. तर उर्वरित १५० क्विंटल कांद्याला चांगला भाव मिळेल, या अपेक्षेने निवड करून साठवून ठेवला होता. परंतु चोरट्यांनी शिल्लक असलेल्या कांद्यापैकी सात ते आठ क्विंटल कांदा चाळीतून भरलेल्या पाट्यांसहित रात्री लंपास केला. 

हेही वाचा > धक्कादायक! रक्षकच जेव्हा भक्षक बनतो तेव्हा; पोलिस पतीसह पाच जणांकडून पत्नीचा छळ

आबा शेवाळे यांचे वडील कारभारी शेवाळे रोज रात्री या कांदा चाळीत कांदा राखण्यासाठी राहत होते. मात्र चोरट्यांनी कांदा चाळीत शेतकरी कांदा राखायला येण्याआधीच आठच्या सुमारास डल्ला मारला. हे रविवारी (ता.१) सकाळी शेतकरी शेतात गेले असता कांदा चोरीला गेल्याचे निदर्शनास आले. आजच्या बाजारभावाप्रमाणे सुमारे ५० ते ६० हजारांचे नुकसान झाले आहे. कांदाचोरीच्या घटना दिवसेंदिवस वाढत असल्याने शेतकऱ्यांना दिवसभर शेतात काम व रात्री कांदाचाळी राखाव्या लागत असल्याची वेळ आली आहे. 

हेही वाचा > ह्रदयद्रावक! अखेरच्या क्षणीही मैत्रीचा घट्ट हात कायम; जीवलग मित्रांच्या एकत्रच निघाल्या अंत्ययात्रा