शेतकऱ्यांनो सावधान! महिनाअखेर अन्‌ जुलैत खरिपाची अधिक काळजी घ्यावी लागणार...कारण..

नाशिक : शेतकऱ्यांनो सावधान...निसर्ग चक्रीवादळापाठोपाठ मृग नक्षत्रात झालेल्या पावसावर राज्यातील पाच टक्के क्षेत्रावर खरिपाच्या पेरण्या झाल्या आहेत. पण हवामान विभागाच्या अंदाजानुसार शुक्रवार (ता.19)पासून महिनाअखेर अन्‌ जुलैत खरिपाची काळजी घ्यावी लागणार आहे...कारण...

हवामान विभागाचा अंदाज

लॉकडाउनमध्ये प्रदूषणावर नियंत्रण मिळाल्याचा परिणाम की काय, पण मृग नक्षत्रात वेळेवर पावसाला सुरवात झाली आहे. हवामान विभागाच्या अंदाजानुसार 24 जूनपासून 15 जुलैपर्यंत पाऊस होईल. तसेच 15 ते 26 जुलैला खंड पडल्यानंतर 26 जुलै ते 15 ऑगस्टपर्यंत पाऊस होईल. मग पाऊस उघडीप देईल. पुढे 15 ते 30 सप्टेंबरला पाऊस होईल आणि दहा दिवसांहून अधिकचा खंड दिल्यानंतर 13 ते 25 ऑक्‍टोबरला अधिक पाऊस होईल. 

पावसाने दिली उघडीप

जुलैअखेरनंतर पुढील चित्र अधिक स्पष्ट होण्यास मदत होईल, असे हवामान अभ्यासकांचे म्हणणे आहे. दरम्यान, जमिनीत ओलावा आहे. ढगाळ हवामान आणि आर्द्रता आहे. वाऱ्याचा वेग नसल्याने पाने आणि जमिनीतील पाण्याचे बाष्पीभवन होत नाही. त्यामुळे सद्यःस्थितीत पावसाने उघडीप दिली, तरीही त्याचा पिकांवर फारसा परिणाम होणार नसल्याचे राहुरीच्या महात्मा फुले कृषी विद्यापीठाचे कुलसचिव मोहन वाघ यांनी सांगितले. 

फ्लॉवर, मिरची, टोमॅटो बियाण्याला मागणी 

भाजीपाल्यात फ्लॉवर, मिरची आणि टोमॅटो बियाण्याला अधिक मागणी आहे. राज्यात आतापर्यंत 15 टन भाजीपाला बियाणे विक्री झाली असून, त्यात 12 टन कांद्याच्या बियाण्यांचा समावेश आहे. कापसाची दीड कोटी पाकिटे बियाण्यांची, तर सोयाबीनचे 10, मक्‍याचे 8, भाताचे 5 टन बियाण्यांची विक्री आतापर्यंत झाली आहे. याशिवाय जिल्ह्यात युरिया 38, डी. ए. पी. 59, एम. ओ. पी. 14, अमोनिअम सल्फेट 11, इतर 75 टन खते विक्रीसाठी उपलब्ध झाली आहेत. बियाणे आणि खतांच्या घाऊक व्यापाऱ्यांकडून ही माहिती मिळाली. 

हेही वाचा > मृगाच्या पावसाने शेतकऱ्यांना दिलासा!...खरिपाच्या पेरणीला मिळाला वेग..

पावसाच्या खंडावेळच्या उपाययोजना 

- कापसासाठी ठिबक आणि इतर पिकांना तुषार संचाने पाणी द्यावे 
- शेत आणि बांध तणविरहित ठेवावा 
- लष्करी अळीच्या नियंत्रणासाठी मक्‍याच्या पोग्यात पाच टक्के निंबोळी अर्क फवारावा 
- कापूस, तूर, मूग, उडीद, ज्वारी, बाजरी, सोयाबीनवरील रस शोषणाऱ्या किडीचा प्रादुर्भाव रोखण्यासाठी निंबोळी अर्क फवारावा 
- बांधावरही पाच टक्के निंबोळी अर्क फवारावा 
(कृषी विभागातील अधिकाऱ्यांचा सल्ला) 

हेही वाचा > कोरोनापेक्षा त्यांच्या "त्या' नजरांचीच अधिक भीती...आशा कर्मचारी सांगताएत 'आपबिती'...थरारक अनुभव