ग्रामपंचायत निवडणुक : इच्छुकांनो, अर्ज भरताय मग ही काळजी घ्या ! 

येवला (जि.नाशिक) : गावकी व भावकीच्या राजकारण ठरवणारी अन् गावासाठी मिनी विधानसभा असलेल्या ग्रामपंचायतीच्या निवडणुकीचा उमेदवारी अर्ज भरण्यासाठी इच्छुकांची कागदपत्रे जमवताना एकच धावपळ सुरू आहे. अनेक जण अर्ज कसा भरावा, काय कागदपत्रे लागतील याची माहिती घेत आहेत. या वेळी अर्ज भरताना बाद होऊ नये म्हणून विविध काळजी उमेदवारांना घ्यावी लागणार आहे. मात्र उमेदवारी अर्जासोबत खुल्या प्रवर्गासाठी ५००, तर राखीव प्रवर्गासाठी १०० रुपये अनामत, तर खर्चाची मर्यादा २५ ते ५० हजारांच्या दरम्यान आहे. 

 इच्छुकांनो, अर्ज भरताय मग ही काळजी घ्या !
सर्व कागदपत्रे जमवले, की इच्छुकांना निवडणूक आयोगाच्या panchayatelection.maharashtra.gov.in या संकेतस्थळावर जाऊन अर्ज भरायचा आहे. त्याची प्रिंट घेऊन त्यावर सही करून सर्व कागदपत्रे जोडलेले अर्ज निवडणूक अधिकाऱ्याकडे जमा करावा लागेल. राज्य निवडणूक आयोगाच्या याच संकेतस्थळावर गुन्हेगारी पार्श्वभूमी आणि जंगम मालमत्तेचा तपशील व सुधारित नमुन्यातील शपथपत्रदेखील द्यावे लागणार आहे. ही माहिती संगणकीय प्रणालीवर भरता येणार असून, त्याची प्रिंट काढून साक्षांकित करून अर्जासोबत निवडणूक अधिकाऱ्याकडे द्यावी लागेल. 
उमेदवारासाठी सर्वांत महत्त्वाचा निकष म्हणजे तो त्या ग्रामपंचायत क्षेत्रातील मतदार असावा. त्याला स्वतःच्या प्रभागाव्यतिरिक्त दुसऱ्या प्रभागातून उभे रहायचे असल्यास मतदार यादीच्या पानाची प्रत जोडावी लागेल. शौचालय वापराबाबतचे प्रमाणपत्र व ग्रामसभेचा ठराव किंवा स्वयंप्रमाणपत्र जोडावे लागणार आहे. उमेदवाराला जास्तीत जास्त चार अर्ज दाखल करता येणार असून, एकाच प्रभागात मात्र एकापेक्षा अधिक वर्गवारीतून अर्ज दाखल करता येणार नाही. 

उमेदवारी मागे घेण्यासाठी...

उमेदवाराला खर्च करण्यासाठी राष्ट्रीयीकृत बँकेमध्ये स्वतंत्र खाते खोलावे लागणार असून, याचा हिशोब अधिकाऱ्यांनी दिलेल्या वेळेत द्यावा लागेल. निवडणूक खर्चाची मर्यादा २५ ते ५० हजारांपर्यंत आहे. उमेदवारी मागे घेण्यासाठी उमेदवाराला आधारकार्ड व मतदान ओळखपत्राच्या प्रतीसह संबंधित निवडणूक निर्णय अधिकारी याकडे मागे घेण्याची नोटीस द्यावी लागेल. निवडणूक चिन्हाच्या यादीतील मुक्त चिन्हांपैकी एका प्रभागात एक निवडणूक चिन्ह दिल्यानंतर पुन्हा इतर उमेदवारांना ते चिन्ह देता येणार नाही. उमेदवारी अर्जासोबत १० ते २० प्रकारची वेगवेगळी कागदपत्रे जोडावी लागणार आहे. यासंदर्भात सोशल मीडियावर कागदपत्रांची यादी काही कार्यकर्ते फिरवत असून, जनजागृती सुरू आहे. विशेष म्हणजे ऑनलाइन अर्ज भरण्यासाठी संगणक सेवाचालक सोशल मीडियातून जाहिरात करत आहेत. 

हेही वाचा >> डॉक्टरांचे ऐकले असते तर आज 'त्यांचे' प्राण वाचले असते! परिसरात हळहळ

आत्ताच कागदपत्र जमा करण्याची लगबग

दरम्यान, उमेदवारी अर्ज दाखल करण्यास २३ डिसेंबरपासून सुरवात होत असून, ३० डिसेंबरला दुपारी तीनपर्यंत ही मुदत आहे. या दरम्यान २५ ते २७ तारखेला तीन दिवस सुटी असल्याने उमेदवारी अर्ज भरण्यासाठी अवघे पाच दिवस मिळणार आहेत. त्यामुळे आत्ताच कागदपत्र जमा करण्याची लगबग सुरू आहे. 

ही वाचा >> पित्याच्या सांगण्यावरून अखेर घटनेचा ११२ दिवसांनी उलगडा; धक्कादायक माहिती समोर

इच्छुकांना अर्ज भरणे सोपे व्हावे, यासाठी सविस्तर माहिती दिली जात आहे. निवडणूक चिन्हांचे वाटप नामनिर्देशन पत्राचा अनुक्रमांक अनुसार करण्यात येईल. राखीव जागेसाठी नामनिर्देशनपत्र दाखल करताना किंवा छाननीच्या वेळी मूळ जातप्रमाणपत्र किंवा मूळ जातवैधता प्रमाणपत्र समितीकडे मिळण्यासाठी सादर केलेल्या अर्जाची पावती सादर करणे आवश्यक आहे. -प्रमोद हिले, तहसीलदार, येवला 
 

...असा करता येईल खर्च 
सदस्यसंख्या - खर्च मर्यादा 
सात ते नऊ - २५ हजार 
११ ते १३ - ३५ हजार 
१५ ते १७ - ५० हजार