''मालेगावात आता पेट्रोलपंपांवर फक्त सरकारी वाहनांनाच इंधन मिळणार''
नाशिक : नाशिक जिल्ह्यात मालेगाव वगळता निफाड, सिन्नर आणि नाशिकमध्ये कोरोनाबाधित रुग्ण मिळाले आहेत. मात्र मालेगावमध्ये कोरोनाबाधित रुग्णांची संख्या अधिक आहे. त्यांच्यामुळे कम्युनिटी ट्रान्समिशन झाले, असे म्हणता येणार नाही. तर जे बाधित आहेत ते पूर्वीच्या रुग्णांच्या कुटुंबातील किंवा नातलग आहेत. तरीही ही आकडेवारी वाढू नये, यासाठी मालेगावमध्ये संचारबंदीची अत्यंत कठोर अंमलबजावणी करण्याच्या दृष्टीने पावले टाकले जात आहेत. त्याचाच एक भाग म्हणून मालेगावमध्ये पेट्रोलपंपांवर फक्त सरकारी वाहनांनाच इंधन देण्याचे आदेश दिले असल्याचे जिल्हाधिकारी सूरज मांढरे यांनी सांगितले.
स्वतःहून होम क्वारंटाइन होणे गरजेचे
मालेगावमध्ये कोरोना रुग्णांची वाढती संख्या चिंताजनक आहे. जिल्ह्यात सर्वाधिक रुग्णसंख्या मालेगाव महापालिका क्षेत्रात आहे. नाशिक, निफाड, चांदवड आणि सिन्नर येथे अत्यल्प प्रमाणात रुग्ण आढळलेले आहेत. सद्यःस्थितीत मालेगावात 30 कोरोनाबाधित रुग्ण आहेत. याठिकाणी पहिल्या टप्प्यात जे कोरोनाग्रस्त रुग्ण आढळले होते त्यांच्याच कुटुंबांतील व नातलग नंतर पॉझिटिव्ह आलेले आहेत. त्यामुळे मालेगावमध्ये कोरोना विषाणूने कम्युनिटी ट्रान्समिशन झाले, असे म्हणता येणार नाही. मात्र ही संख्या वाढू नये, यासाठी नागरिकांनी स्वतःहून होम क्वारंटाइन होणे गरजेचे आहे. ज्यांना ताप, सर्दी-खोकल्याची लक्षणे असतील त्यांनी तत्काळ आरोग्य विभागाकडे दाखल व्हावे. नागरिकांनी संचारबंदीचे काटेकोरपणे पालन करावे, असे आवाहनही श्री. मांढरे यांनी केले.
आता कठोर निर्णय
मालेगाव महापालिका क्षेत्रात कठोर निर्णयाची अंमलबजावणी प्रशासनातर्फे सुरू करण्यात आली आहे. मंगळवार (ता. 14)पासूनच पेट्रोलपंप बंद करण्याचे व फक्त सरकारी, अत्यावश्‍यक सेवेतील वाहनांनाच इंधन देण्यात येणार असल्याचे आदेश जिल्हाधिकाऱ्यांनी दिले आहेत. त्याचप्रमाणे पोलिस बंदोबस्तामध्ये सर्वेक्षण सुरू करण्यात आले आहे. ठिकठिकाणी नाकाबंदी केली जाणार असून, तेथे नियंत्रण अधिकारी म्हणून डॉ. पंकज आशिया यांची नियुक्ती करण्यात आलेली आहे. येत्या काही दिवसांत मालेगावमध्ये संचारबंदीच्या आदेशाची कठोर अंमलबजावणी करण्यात येणार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.