धक्कादायक! रागाच्या भरात 'त्याचे' हात देखील थरथरले नाही...बायकोला तर पेटवलंच अन् स्वत:देखील...

नाशिक : (गणूर) पत्नीचे हातपाय बांधून तिला जाळून टाकत पतीने स्वतःलादेखील जाळून घेत आत्महत्या केल्याची धक्कादायक घटना रविवारी (ता. 12) साळसाने (ता. चांदवड) येथे घडली. पत्नीच्या भावाच्या फिर्यादीवरून रात्री उशिरापर्यंत पोलिसांत गुन्हा दाखल करण्याचे काम सुरू होते. 

असा आहे प्रकार

कैलास परशराम वाघ हा पत्नी मनीषा हिच्यासोबत साळसाने येथे राहत होता. दहा महिन्यांपूर्वीच त्यांचा विवाह झाला होता. मात्र कैलास कायम पत्नी मनीषाला मारहाण करत असे. त्यांच्यात भांडण व्हायचे, असे मनीषाचा भाऊ तुळशीराम खुरासने यांनी फिर्यादीत म्हटले आहे. दरम्यान, रविवारी सकाळी अकराला मनीषा जळून मृत झाल्याची माहिती तुळशीराम यांना मिळताच त्यांनी बहिणीचे घर गाठले. या वेळी मनीषा पलंगावर 100 टक्के जळालेल्या अवस्थेत आढळली. शिवाय तिचे हात बांधलेले व तोंडातून जीभ बाहेर आल्याचे स्पष्ट दिसत होते. पती कैलास यानेच तिला जाळून टाकत स्वतःलादेखील पेटवून घेतल्याची फिर्याद खुरासने यांनी पोलिस ठाण्यात दिली. 

हेही वाचा >  BREAKING : मालेगावची परिस्थिती हाताळण्यासाठी विशेष IAS अधिकाऱ्यांची नेमणूक..'हे' अधिकारी सांभाळणार जबाबदारी

दरम्यान, कैलासला जळालेल्या अवस्थेत नाशिक येथे उपचारार्थ नेत असताना रस्त्यातच त्याचादेखील मृत्यू झाला. दोघा पती-पत्नीच्या मृतदेहांचे विच्छेदन केल्यानंतर रात्री साडेआठला नातेवाइकांच्या ताब्यात देण्यात आले.  

हेही वाचा > धक्कादायक!...अन् 'त्या' पोलिस उपनिरीक्षकाने स्वत:वरच झाडली गोळी...