तत्काळ करा 'त्यांच्या' बदल्या!.. का करताय आमच्या आरोग्याची हेळसांड?

अंबासन.jpg
अंबासन.jpg

नाशिक : (अंबासन) येथील प्राथमिक आरोग्य केंद्रात वैद्यकीय अधिकाऱ्याच्या मन मानी कारभारामुळे रुग्णांची हेळसांड होत आहे. याबाबत अनेक वेळा तक्रारी करूनही आरोग्य विभाग दुर्लक्ष करीत असल्याचा आरोप ग्रामस्थांनी केला आहे. दरम्यान, संबंधित वैद्यकीय अधिकाऱ्याला तालुका आरोग्य विभागाने चक्क 11 नोटिसा बजावल्याचे समोर आले आहे. 

वैद्यकीय अधिकारी उपस्थित नसल्याचे निदर्शनास

वैद्यकीय अधिकाऱ्यांची तत्काळ बदलीची मागणी ग्रामस्थांनी केली आहे. याबाबत ग्रामपंचायतीनेही पत्रव्यवहार केला आहे. येथील प्राथमिक आरोग्य केंद्रातील वैद्यकीय अधिकारी मुख्यालयी राहत नाहीत. मंगळवारी (ता. 11) आठवडे बाजार असल्याने रुग्णांची गर्दी होती. मात्र, सकाळी अकरानंतर ही वैद्यकीय अधिकारी उपस्थित नसल्याचे निदर्शनास आले. याबाबत रुग्णांनी ग्रामपंचायतीचे सदस्य जिभाऊ कोर यांना माहिती देताच ते प्राथमिक आरोग्य केंद्रात दाखल झाले. श्री. कोर यांनी तालुका वैद्यकीय अधिकारी हेमंत आहिरराव, गटविकास अधिकारी पांडुरंग कोल्हे, सभापती इंदूबाई ढुमसे व उपसभापती कान्हू आहिरे यांना भ्रमणध्वनीवरून याबाबत माहिती दिली. सकाळी साडे अकराच्या सुमारास वैद्यकीय अधिकारी दुचाकीने आरोग्य केंद्रात हजर झाले. 

49 हजार लोकसंख्येचा भार

तालुक्‍यातील आरोग्य विभागाने संबंधित वैद्यकीय अधिकाऱ्यास 11 नोटिसा बजावल्या असून, नोटिसा वरिष्ठांकडे पाठविण्यात आल्याचे सांगितले. याबाबत वैद्यकीय अधिकारी डॉ. सूरज मंडावत यांच्याशी संपर्क साधला असता, कर्मचारी संख्या कमी असतांनाही आपण आपल्या परीने काम करीत असल्याचे सांगितले. येथील प्राथमिक आरोग्य केंद्रावर परिसरातील 49 हजार लोकसंख्येचा भार आहे. 

अंबासन प्राथमिक आरोग्य केंद्रातील रिक्त जागा 

उपकेंद्र  :  7 
लॅब टेक्‍निशियन  :  1 
आरोग्यसेवक  :  4 
आरोग्यसेविका  :  5 
आरोग्य सहाय्यिका :  1  

आम्ही तीन दिवसांपासून प्राथमिक आरोग्य केंद्रात चकरा मारत आहोत. वैद्यकीय अधिकारी उपस्थित नसल्याने खासगी रुग्णालयात जावे लागते. मोठे आरोग्य केंद्र असूनही रुग्णांची हेळसांड होते. -सुमनबाई सोनवणे, अंबासन 

संबंधित वैद्यकीय अधिकाऱ्याची सखोल चौकशी करून त्यांचा अहवाल वरिष्ठ अधिकाऱ्यांकडे पाठविण्यात येईल. -हेमंत आहिरराव, तालुका वैद्यकीय अधिकारी, बागलाण 

वरिष्ठ अधिकाऱ्यांना याबाबत माहिती दिली होती. तसेच वैद्यकीय अधिकाऱ्यास वेळोवेळी सूचना देऊनही मुख्यालयात राहत नसेल, तर तातडीने बदली करण्यात यावी. -कान्हू आहिरे, उपसभापती, पंचायत समिती, बागलाण 

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com