गोदावरी, नंदिनीत प्रदूषण कायम; निवासी व व्यापारी पेठांमध्ये ध्वनिप्रदूषणातही वाढ

नाशिक : कोरोनामुळे जाहीर करण्यात आलेल्या साडेतीन महिन्यांचा लॉकडाउन काळ वगळता शहरातील हवा, पाणी व ध्वनिप्रदूषणात वाढ झाल्याचे समोर आले आहे. महापालिकेच्या पर्यावरण विभागातर्फे वार्षिक पर्यावरण मापन अहवाल जाहीर करण्यात आला. त्यातून ही माहिती समोर आली आहे. वर्दळीच्या ठिकाणी हवेत सल्फरडाय ऑक्साइड प्रमाणापेक्षा अधिक, तर गोदावरी नदीपात्रात तपोवन भागात बायोकेमिकल ऑक्सिजन डिमांडचे प्रमाण अधिक आढळले आहे. निवासी व व्यापारी पेठांमध्ये ध्वनिप्रदूषणाने पातळी ओलांडली आहे. 

कार्बन मोनाक्सॉइड वाढले 
सीबीएस, पंचवटी कारंजा, द्वारका सर्कल, पाथर्डी फाटा येथे हवेतील पार्टिक्युलेट मॅटर (पीएम १०)चे प्रमाण अधिक आढळले. आयटीआय सिग्नल, द्वारका, बिटको चौकात हवेतील सल्फरडाय ऑक्साइडचे प्रमाण मानांकनापेक्षा अधिक आढळले. नायट्रोजन डायऑक्साइडचे प्रमाण नियंत्रणात आढळले. सीबीएस, मुंबई नाका व पाथर्डी फाटा येथे हवेतील कार्बन मोनॉक्साइडचे प्रमाण चार मायक्रोग्रॅम प्रतिघनमीटरपेक्षा अधिक आढळले आहे. 

हेही वाचा - जन्मतः अंध घुबडाची श्रुती बनली "आई-बाबा"! कोरोना काळातील एक अनोखी कथा अन् प्रेमही​
 

जलप्रदूषण कायम 
गंगापूर गाव, गोदा पार्क व तपोवनात पाण्याचे नमुने तपासण्यात आले. यातील तपोवन भागात बायोकेमिकल ऑक्सिजन डिमांड (बीओडी) १० मिलिग्रॅम प्रतिलिटर या मानकापेक्षा अधिक आढळले. नंदिनी नदीत आयटीआय पूल, सिटी सेंटर मॉल व समाजकल्याण कार्यालयाच्या आवारात पाण्याचे नमुने घेण्यात आले. तेथे सर्वच ठिकाणी मानांकनापेक्षा अधिक बीओडीचे प्रमाण आढळले. वाघाडी नदीवरील म्हसरूळ अमरधाम, जुना हत्ती पूल व गणेशवाडी येथे बीओडीचे प्रमाण अधिक आहे. वालदेवी नदीवरील विहितगाव येथे मानांकनापेक्षा अधिक बीओडी आढळून आला. 

निवासी क्षेत्रात ध्वनिप्रदूषण 
रहिवासी क्षेत्रात सकाळी ५५, तर रात्री ४५ डेसिबल ध्वनी मर्यादा असणे आवश्यक आहे; परंतु पंचवटी कारंजा व द्वारका भागात ध्वनिप्रदूषणाने पातळी ओलांडली आहे. व्यापारीपेठेत सकाळी ६५, तर रात्री ५५ डेसिबल ध्वनी मर्यादा असणे आवश्यक आहे. या भागातही ध्वनीने मर्यादा ओलांडली असून, सातपूर औद्योगिक वसाहतीमध्ये ७२, तर अंबड औद्योगिक वसाहती क्षेत्रात ७० डेसिबलपेक्षा अधिक ध्वनी मर्यादा ओलांडली आहे. 

हेही वाचा - ह्रदयद्रावक! जीवलग मित्राच्या मृत्यूनंतर अवघ्या दोन दिवसातच निघाली अंत्ययात्रा; अख्खे गाव हळहळले