कृषी अभ्यासक्रमांच्‍या प्रवेश नोंदणीची आज अंतिम मुदत 

नाशिक : एमएचटी- सीईटी परीक्षेच्‍या गुणांवर आधारीत बी.एस्सी. (कृषी) अभ्यासक्रमासह अन्‍य कृषी अभ्यासक्रमांच्‍या प्रथम वर्ष पदवीच्‍या प्रवेशासाठी नोंदणीप्रक्रिया सुरू आहे. विद्यार्थ्यांना प्रवेशापासून मुकावे लागू नये, यामुळे नोंदणी प्रक्रियेची मुदत वाढविली होती. या वाढीव मुदतीनुसार विद्यार्थ्यांना बुधवार (ता. २३) पर्यंत संकेतस्‍थळावर नोंदणी करण्याची अंतिम मुदत असणार आहे. 

कॅप राउंडमध्ये सहभागासाठी नोंदणी बंधनकारक 

कृषी पदवी, कृषी अभियांत्रिकी (बी. टेक.) यांसह कृषी शाखेतील अभ्यासक्रमांच्‍या प्रवेशासाठी प्रक्रिया सुरू झालेली आहे. राज्‍यातील चारही कृषी विद्यापीठांशी संलग्‍न महाविद्यालयांत प्रवेशासाठी या प्रक्रियेत सहभागी होणे आवश्‍यक आहे. कॅप राउंडमध्ये सहभागी होण्यासाठी विद्यार्थ्यांना नावनोंदणी करणे आवश्‍यक आहे. ही प्रक्रिया गेल्‍या ९ डिसेंबरला सुरू झाली होती. यापूर्वी जारी केलेल्‍या वेळापत्रकानुसार नोंदणीची मुदत १६ डिसेंबरपर्यंत होती. विद्यार्थ्यांना प्रवेशापासून वंचित राहावे लागू नये, याकरिता नोंदणी मुदतीत वाढ केलेली होती. त्‍यानुसार उद्यापर्यंत विद्यार्थ्यांना संकेतस्‍थळावर नोंदणी करण्यासह आवश्‍यक ती प्रक्रिया पूर्ण करावी लागणार आहे. दरम्‍यान, या पुढील कॅप राउंडचे सविस्‍तर वेळापत्रक तीन दिवसांत जारी केले जाणार आहे.

हेही वाचा >> डॉक्टरांचे ऐकले असते तर आज 'त्यांचे' प्राण वाचले असते! परिसरात हळहळ

४४ हजार विद्यार्थ्यांनी नोंदणीप्रक्रिया राबविली

राज्‍यस्‍तरावर आतापर्यंत ४४ हजार विद्यार्थ्यांनी नोंदणीप्रक्रिया राबविली आहे. यापैकी ३२ हजार २११ विद्यार्थ्यांनी अर्ज भरले आहेत. सुविधा केंद्र (एफसी)च्‍या माध्यमातून १५ हजार ४८२ अर्ज मंजूर केलेले आहेत. सहा हजार १९६ अर्ज प्रलंबित ठेवण्यात आले आहेत.  

हेही वाचा >> पित्याच्या सांगण्यावरून अखेर घटनेचा ११२ दिवसांनी उलगडा; धक्कादायक माहिती समोर