आर्थिक कोंडीतील शेतकऱ्यांना टोमॅटोचा आधार; प्रतवारी व दर्जानुसार दोनशे ते साडेचारशे रुपये दर 

दिंडोरी (नाशिक) : तालुक्यातील शेतकरी यंदा तीव्र अडचणीत सापडला होता, तसेच अतिवृष्टीच्या तडाख्याने हैराण व हतबल झालेल्या शेतकऱ्यांच्या विविध पिकांची मोठ्या प्रमाणावर हानी झाल्याने आर्थिक कोंडीत सापडलेल्या शेतकऱ्यांना आता टोमॅटोने सुरवातीपासून आजपर्यंत भाव टिकून राहिल्याने आर्थिक आधार दिला आहे. 

दिंडोरी तालुक्यात एप्रिलमध्ये द्राक्षपिकाचे भाव पाच रुपये प्रतिकिलो इतके खाली आल्याने द्राक्ष उत्पादक आर्थिक अडचणीत सापडला होते. तसेच परतीच्या पावसामुळे पूर्व व पश्चिम भागात विविध खरिपाच्या पिकांची वाताहत झाली. नुकसानीचे पंचनामे, भरपाईची मागणी याबाबत सर्वच स्तरांवरून पाठपुरावा सुरू आहे. तालुक्यातील द्राक्षबागांसह भात, नागली, वरई ही पिकेही धोक्यात आली आहेत. टोमॅटो पिकाचेही नुकसान झालेच आहे. मात्र तुलनात्मक कमी असले तरी सध्या टोमॅटोला असलेले दर नाहीपेक्षा बऱ्यापैकी असल्याने टोमॅटो उत्पादकांना तेवढाच आधार आता उरला आहे. सुमारे दोनशे ते साडेचारशे असा दर प्रतवारी व दर्जानुसार उत्पादकांना मिळतो आहे. 

हेही वाचा- अखेर बेपत्ता शेतमजूराचा शोध लागला; पण धक्कादायक दृश्याने गावात खळबळ

प्रतिदिवशी सुमारे २५ ट्रक टोमॅटो विक्री

तालुक्यात टोमॅटोची मोठ्या प्रमाणावर लागवड केली आहे. नुकसान झाल्यानंतर दुबार लागवड झाली होती. पावसाच्या तडाख्यात काही उत्पादकांचे नुकसान झाले. मात्र तरीही अशा प्रसंगाला सामोरे जाऊन बहुतांशी उत्पादकांनी हे पीक जगविण्यासाठी आर्थिक अतिरिक्त भार सोसला आहे. दरम्यान, वणी-सापुतारा रस्त्यावरील बाजार समितीच्या उपबाजारात व खोरीफाटा भागात टोमॅटो खरेदी-विक्री केंद्र सुरू झाले आहे. सद्यःस्थितीत मोठी आवक टोमॅटोची होते आहे. गुजरात, उत्तर प्रदेश, राजस्थान येथील व्यापारी खरेदीचे व्यवहार करत आहेत. टोमॅटो प्रतवारी, पॕकिंग, ट्रकमध्ये टाकण्याचे काम परप्रांतीय कामगार करतात. व्यापाऱ्यांनी हे कामगार सोबतच आणले आहेत. तसेच स्थानिक व्यापारीही टोमॅटो खरेदी करून परराज्यात पाठवीत आहे. प्रतिदिवशी सुमारे २५ ट्रक टोमॅटो परराज्यात विक्रीसाठी जात आहे, अशी माहिती टोमॅटो व्यापाऱ्यांनी दिली. मोठी आर्थिक उलाढाल यानिमित्ताने होते आहे. टोमॅटो खरेदी-विक्री व्यवहार प्रणालीमुळे वणी-सापुतारा रस्त्याला यात्रेचे स्वरूप आले आहे. ट्रॅक्टर, पिक-अप जीप, छोटा हत्ती अशा विविध वाहनांची वर्दळ वाढली आहे. दरम्यान, सद्यःस्थितीत टोमॅटोला मिळणाऱ्या दरामुळे उत्पादकांना काही अंशी आर्थिक दिलासा मिळाला आहे.

हेही वाचा - संशयास्पद दिसणाऱ्या बुलेटच्या सीटखालून मिळाल्या धक्कादायक गोष्टी; पोलीसांच्या तपासणीत खुलासा