भरचौकात 'त्यांनी' मुंडण करून घातले श्राद्ध; वाचा नेमके काय घडले?

नाशिक : (येवला) शहरात जिकडे जावे तिकडे रस्त्यात खड्ड्यांचे साम्राज्य तयार झाले असून, प्रचंड दुरवस्था झाली आहे. पालिका मुरूम किंवा खडी टाकून तात्पुरती मलमपट्टी करते. मात्र यामुळे रस्त्यांची दुरवस्था कायम आहे. वर्षानुवर्षे ही समस्या असताना हा प्रश्न सुटत नसल्याने या प्रकाराचा निषेध नोंदवत दुरुस्तीच्या मागणीसाठी येथील सामाजिक कार्यकर्ते अमोल गायकवाड व विशाल नागपुरे यांनी अनोखे आंदोलन केले. 

आगळावेगळा निषेध नोंदवला

सामाजिक कार्यकर्ते अमोल गायकवाड व विशाल नागपुरे यांनी येथील खांबेकर खुंटावर शुक्रवारी (ता.२१) रस्त्यांचे प्रतीकात्मक श्राद्ध घालून मुंडण करत अनोखे आंदोलन केले. शहरातील बोटावर मोजण्याइतके रस्ते सोडले तर शहरातील बाजारपेठेसह छोट्या-मोठ्या रस्त्यांची अक्षरशः वाट लागली आहे. नागरिकांना या रस्त्यावरून चालणे मुश्कील झाले असून, वारंवार मागणी करूनही प्रशासन आणि लोकप्रतिनिधी त्याकडे दुर्लक्ष करत आहेत. पालिकेडे केलेल्या मागणीलाही प्रतिसाद न मिळाल्याने नाईलाजाने मुंडण करून साद घालत आगळावेगळा निषेध नोंदवल्याचे अमोल गायकवाड यांनी सांगितले. 

हेही वाचा > शिवप्रेमींत हळहळ; शिवप्रेमी रितेशची किल्ल्यावरील 'ती' सेल्फी शेवटची ठरली, काय घडले?

अधिकारी फिरकलेही नसल्याने नाराजी

या वेळी आंदोलनकर्त्यांनी दगडाची रचनात्मक प्रतिमा तयार करून मुंडण करत श्राद्ध घातले. आंदोलनास अनेक नागरिकांनी भेट देत पाठिंबाही दिला. या वेळी रवी पवार, हेमंत हलवाई, संतोष गायकवाड, मनोज भागवत, संजय सोनवणे, सुनील भावसार, राहुल भावसार आदींसह कार्यकर्ते उपस्थित होते. शहरातील रस्ताप्रश्‍नी आंदोलन ठिकाणी एकही लोकप्रतिनिधी किंवा अधिकारी फिरकला नसल्याने त्यांनी नाराजी व्यक्त केली.

हेही वाचा > अचानक सायरनचा तो धडकी भरविणारा आवाज..नागरिकांत घबराट अन् सुटकेचा निश्वास! काय घडले नेमके?

संपादन - किशोरी वाघ