Dhule Gram Panchayat : 20 ग्रामपंचायतींत 28 रिक्त जागा; पारंपरिक पद्धतीने पोटनिवडणुकीचा कायक्रम जाहीर

Dhule Gram Panchayat : जिल्ह्यात जानेवारी ते डिसेंबर २०२३ या कालावधीत मुदती संपणाऱ्या शिरपूर तालुक्यातील १५, साक्री तालुक्यातील ३, शिंदखेडा तालुक्यातील १३ अशा एकूण ३१ ग्रामपंचायतीच्या सदस्य व थेट सरपंचपदासह सार्वत्रिक निवडणुकांसाठी संगणक प्रणालीद्वारे राबविण्याचा, तसेच धुळे तालुका ९, शिरपूर तालुका १, शिंदखेडा तालुका ३ व साक्री तालुका ७ अशा एकूण २० ग्रामपंचायतींतील रिक्त २८ जागांच्या पोटनिवडणुकांसाठी पारंपरिक पद्धतीने राबविण्याचा निवडणूक कार्यक्रम जाहीर झाला. (28 Vacancies in 20 Gram Panchayat election dhule news)

सामान्य प्रशासन शाखेचे उपजिल्हाधिकारी नितीन गावंडे यांनी सांगितले, की राज्य निवडणूक आयोगाच्या सूचनेनुसार ३१ ग्रामपंचायतींसाठी नामनिर्देशनाची प्रक्रिया संगणक प्रणालीद्वारे करण्यात येईल. वीस ग्रामपंचायतींतील पोटनिवडणुकांसाठी पारंपरिक पद्धतीने नामनिर्देशनपत्र स्वीकारण्यात येतील.

नामनिर्देशनपत्रासोबत वैधता प्रमाणपत्र देण्यासाठी पडताळणी समितीकडे सादर केलेल्या अर्जाची सत्यप्रत किंवा पडताळणी समितीकडे अर्ज केला असल्याबाबतचा अन्य कोणताही पुरावा आणि निवडून आल्याच्या तारखेपासून बारा महिन्यांच्या आत पडताळणी समितीने दिलेले वैधता प्रमाणपत्र सादर करील, असे हमीपत्र देण्याची मुभा उमेदवारांना देण्यात आली आहे.

संबंधित निवडणूक क्षेत्रात आचारसंहिता लागू राहील. मतदारांवर प्रभाव टाकणारी कोणतीही कृती, घोषणा मंत्री, खासदार, आमदार व संबंधित स्थानिक स्वराज्य संस्थेतील पदाधिकाऱ्यांना आचारसंहिता कालावधीत करता येणार नाही, असे पत्रकात म्हटले आहे.