Dhule News : सरकारच्या धोरणामुळेच शेतकरी कर्जबाजारी : अनिल घनवट

Dhule News : धुळे जिल्ह्यातील शेतकरी नैसर्गिक आपत्ती, तसेच शेतमालाचे भाव पाडणाऱ्या सरकारच्या धोरणामुळे कर्जबाजारी झाले आहेत. कोणत्याही पक्षाची शेतकऱ्यांना संपूर्ण कर्जमुक्त करण्याची इच्छा नाही.

शेतकऱ्यांचे व देशाचे दारिद्र्य हटविण्यासाठी स्वतंत्र भारत पक्ष हा एकच पर्याय आहे, असे मत स्वतंत्र भारत पक्षाचे राष्ट्रीय अध्यक्ष अनिल घनवट यांनी व्यक्त केले.(Anil Ghanwat statement of Farmers are indebted because of government policies dhule news)

धुळे शहरातील शिक्षकेत्तर कर्मचारी भवनच्या सभागृहात पक्षाचे चर्चासत्र झाले. त्या वेळी घनवट मार्गदर्शन करीत होते. या वेळी प्रदेशाध्यक्ष मधुसूदन हरणे, महिला आघाडीच्या अध्यक्षा सीमा नरोडे व शेतकरी संघटनेचे विभागप्रमुख शशिकांत भदाणे उपस्थित होते. अध्यक्ष घनवट म्हणाले, की देशात व राज्यात राजकारणाची पातळी ढासळली आहे.

कोणत्याही पक्षाला विचारधारा राहिली नाही. सत्तेत राहण्यासाठी पक्ष फोडणे व गुन्हेगारांना पाठीशी घातले जात आहे. भ्रष्टाचाराचा अतिरेक झाला आहे. एकही प्रस्थापित कायदा व सुव्यवस्था प्रस्थापित करू शकत नाही.

देशात कायद्याचे राज्य पुनर्स्थापित करण्यासाठी, शरद जोशींनी निर्माण केलेला स्वतंत्र भारत पक्ष बळकट करणे गरजेचे आहे. संपूर्ण वन्यप्राण्यांचा बंदोबस्त, सुरळीत वीजपुरवठा व कर्जमुक्तीसाठी जानेवारीत राज्यव्यापी आंदोलन करणार असल्याचा निर्धार व्यक्त केला.

दरम्यान, या चर्चासत्राचे संयोजन शेतकरी संघटनेचे उत्तर महाराष्ट्र विभागप्रमुख शशिकांत भदाणे, भगवान पाटील, नीलकंठ पवार, रणजितसिंह राऊळ, निंबा पाटील, शांतुभाई पटेल, आत्माराम पाटील, पी. डी. देवरे, रवींद्र वाणी, प्रा. बी. पी. शिरसाठ, राजेंद्र कोरडकर, राहुल गवळे, सरपंच सुजणे, रामदास जगताप, प्रमोद पाटील, अविनाश पाटील, भगवान पाटील, नानाजी शेलकर आदींनी केले.

दरम्यान, या वेळी धुळे जिल्हा स्वतंत्र भारत पक्षाच्या जिल्हाध्यक्षपदी गुलाबसिंग रघुवंशी, तर शेतकरी संघटनेच्या धुळे जिल्हाध्यक्षपदी पी. डी. देवरे यांची निवड झाली.