Dhule News : राष्ट्रीय पॉवर लिफ्टिंग स्पर्धेत धुळ्यातील खेळाडूंची पदकांची कमाई

धुळे : सोनीपत (हरियाना) येथे झालेल्या राष्ट्रीय पॉवर लिफ्टिंग स्पर्धेत धुळे शहरातील युनिक फिटनेस क्लबच्या चार खेळाडूंनी सुवर्ण व रजतपदकांची कमाई केली.

या खेळाडूंचा रविवारी (ता. २) क्लबतर्फे शिवसेनेचे उपमहानगरप्रमुख कैलास मराठे यांच्या हस्ते सत्कार करण्यात आला. (Athletes win medals at National Powerlifting Championships dhule news)

सोनीपत (हरियाना) येथे नुकतीच राष्ट्रीय पॉवर लिफ्टिंग स्पर्धा झाली. स्पर्धेत शहरातील गल्ली क्रमांक ६ मधील युनिक फिटनेस क्लबचे हृषीकेश जाधव, वरद नेवे, तेजस कोलते, पूनम काळे सहभागी झाले. हृषीकेश जाधव याने डेड लिफ्ट प्रकारात (१४० किलो) तसेच बेंच प्रेसमध्ये (७० किलो) अशी दोन सुवर्णपदके पटकावली.

विशेष म्हणजे हृषीकेश हा दिव्यांग आहे. वरद जितेंद्र नेवे याने डेड लिफ्टमध्ये (१४० किलो) सुवर्ण व बेंच प्रेस प्रकारात (५० किलो) रजतपदक मिळविले. वरद हा १४ वर्षांचा आहे.

हेही वाचा : शॉर्ट सेलर्स म्हणजे नक्की कोण?

तेजस एकनाथ कोलते याने बेंच प्रेस प्रकारात (९० किलो) सुवर्णपदके, तर पूनम संजय काळे हिने डेड लिफ्ट प्रकारात १२० किलो वजन उचलून सुवर्णपदक व बेंच प्रेसमध्ये ६० किलो वजन उचलून सुवर्णपदक प्राप्त केले.

या सर्व खेळाडूंना प्रशिक्षक स्वराज गोयर, भूपेंद्र सूर्यवंशी यांचे मार्गदर्शन लाभले. खेळाडूंच्या सत्कारप्रसंगी सागर भडागे, अशोक बडगुजर, नीलेश शर्मा, एकनाथ कोलते, सुवर्णा कोलते, संजय काळे, सुरेश सोनार आदी उपस्थित होते.