Dhule News : कंत्राटी आरोग्य कर्मचाऱ्यांचे कायम सेवेसाठी आंदोलन

धुळे : महापालिकेच्या आरोग्य विभागात विविध जागा भरल्या जातील. या जागांवर राष्ट्रीय आरोग्य अभियानांतर्गत कंत्राटी कर्मचाऱ्यांना सामावून घ्यावे, अशी मागणी कंत्राटी कर्मचाऱ्यांनी केली. याबाबत त्यांनी जिल्हाधिकारी जलज शर्मा यांना निवेदन दिले. तसेच शासन, प्रशासनाचे लक्ष वेधण्यासाठी जिल्हाधिकारी कार्यालयाबाहेर निदर्शने केली.

आंदोलनाद्वारे विविध समस्यांकडे लक्ष वेधताना आंदोलकांनी न्यायालयीन लढ्याचा इशाराही दिला. महापालिकेत राष्ट्रीय आरोग्य अभियानांतर्गत कंत्राटी तत्त्वावर डॉक्टर, फार्मासिस्ट, नर्स, प्रयोगशाळा तंत्रज्ञ, लिपिक २०१४ पासून मानधनावर आहेत. (Contractual health workers Agitation for permanent service Dhule News)

हेही वाचा : द मिसिंग टाइल सिंड्रोम ठेवा आपल्यापासून दूर

कोविड काळात सर्वांनी जिवावर उदार होत रुग्णसेवा केली. पिंपरी- चिंचवड महापालिकेने राष्ट्रीय आरोग्य योजनेतंर्गत कार्यरत कर्मचाऱ्यांना कायम सेवेत सामावून घेतले. महापालिकेला आरोग्य विभागात पदे भरण्यास शासनाने मान्यता दिली आहे.

त्यामुळे या जागांवर कंत्राटी कर्मचाऱ्यांना सेवा ज्येष्ठतेनुसार प्राधान्य द्यावे, कर्मचाऱ्यांना सामावून घेतले नाही, तर न्यायालयात याचिका दाखल करू, असा इशारा डॉ. सोनल वानखेडे, डॉ. प्रीती अग्रवाल, डॉ. प्रशांत मराठे, डॉ. अर्चना आगळे, डॉ. सूरज पावरा, लेखा व्यवस्थापक हर्षाली चौधरी, पुनम जयस्वाल, नम्रता पावटे, सुमीत चौधरी, सलमा बानो अन्सारी, कल्याणी गावित, श्वेता कदम, रंजिता पावरा, भारती मासुळे, ज्योती कदम, सुरेखा कांबळे, दीप्ती घुगे, प्रियंका वसावे, प्रियंका सूर्यवंशी, विशाखा पाखले, मीनाक्षी वाघ आदींनी दिला.