धुळे : अपघातानंतर दुचाकी पेटल्या, दोन युवक ठार

शिरपूर जि.धुळे : भरधाव दुचाकींची समोरासमोर धडक होऊन झालेल्या अपघातात दोन युवक ठार झाले. हा अपघात 28 मार्चला रात्री शिरपूर-बोराडी रस्त्यावरील नांदरडे गावाजवळ घडला. अपघातानंतर स्फोट होऊन दोन्ही दुचाकी पेटल्या.

कैलास महादू पावरा (वय 27, रा.वाकपाडा) व राकेश शांतीलाल सैंदाणे (वय 23, रा.बोराडी) अशी मृतांची नावे आहेत. कैलास शहरातील कोल्ड स्टोरेजमध्ये कामाला होता. रात्री घराकडे जातांना त्याच्या दुचाकीला राकेशच्या दुचाकीने धडक दिली. कैलास जागीच ठार झाला तर राकेशचा रुग्णालयात नेताना मृत्यू झाला.