Dhule Crime News : बिजासन घाटात 54 किलो गांजासह शिरपूरच्या तिघांना अटक

शिरपूर : महाराष्ट्रातून मध्य प्रदेशात गांजाची तस्करी करणारी कार जप्त करून सेंधवा (जि. बडवानी, मध्य प्रदेश) पोलिसांनी तीन संशयितांना अटक केली. १० एप्रिलला महामार्गावर बिजासन (ता. सेंधवा) येथे केलेल्या कारवाईत तिघांना अटक करण्यात आली असून, सर्व संशयित शिरपूर तालुक्यातील रहिवासी आहेत. (Dhule Crime 3 people from Shirpur arrested with 54 kg ganja in Bijasan Ghat)

लोकसभा निवडणुकीच्या पार्श्वभूमीवर बडवानी जिल्ह्यात आंतरराज्यीय नाक्यांवर ऑपरेशन प्रहारअंतर्गत तपासणी मोहीम सुरू आहे. महाराष्ट्रातून मध्य प्रदेशात गांजाची तस्करी सुरू असल्याची माहिती पोलिस अधीक्षक पुनीत गेहलोद यांना मिळाली होती. त्यांनी सहकाऱ्यांना कारवाईचे आदेश दिले. महाराष्ट्रातून आलेल्या वाहनांची बिजासन येथे तपासणी सुरू झाली.

मारुती इको कार (एमपी ०९, डीडी ३३३८) अडवून झडती घेतली असता डिकी व कारमधून तीन प्लॅस्टिक गोण्यांमध्ये भरलेला गांजा आढळला. त्याचे वजन ५४ किलो असून, किंमत दहा लाख ४० हजार रुपये आहे. कारसह एकूण १७ लाख ४० हजार रुपयांचा मुद्देमाल पोलिसांनी जप्त केला. (latest marathi news)

तिघांना अटक

गांजा तस्करी करताना आढळलेले कारमधील संशयित भय्यासिंह कलसिंह डावर (पावरा, वय २८), संदीप सीताराम डुडवे (१९, दोघे रा. निलगिरी पाडा, पळासनेर, ता. शिरपूर) व दिनेश दशरथ कनोजे (३४, रा. हिगाव, ता. शिरपूर) यांना अटक करण्यात आली. पोलिस अधीक्षक पुनीत गेहलोद, अपर अधीक्षक अनिलकुमार पाटीदार.

डीवायएसपी कमलसिंह चौहान यांच्या मार्गदर्शनाखाली सेंधवा ग्रामीण पोलिस ठाण्याचे निरीक्षक दिलीपकुमार पुरी, उपनिरीक्षक अशोक अहिरवार, सहाय्यक उपनिरीक्षक संजय पांडे, हवालदार विनोद मिणा, समरथ राठोड, दिलीप कनोज, अल्केश यांनी ही कामगिरी बजावली.