Dhule News : धुळ्यात स्वच्छतेची ऐशीतैशी! अनेक ठिकाणी कचऱ्याचे साम्राज्य, दुर्गंधीचा सामना

Dhule News : स्वच्छता अभियान, स्वच्छ महाराष्ट्र अभियानासह स्वच्छ-सुंदर धुळे शहराचे नागरिकांना डोस पाजणाऱ्या महापालिकेकडून कचरा संकलनाच्या नावाने बोंब पडत असल्याचे पाहायला मिळत आहे. जे नागरिक, विक्रेते, व्यापारी सार्वजनिक ठिकाणी कचरा टाकून मोकळे होतात, त्यांच्यावरही कठोर कारवाई करण्यात महापालिका कमी पडली आहे. त्यामुळे पुन्हा एकदा शहराचा कचरा झाल्याचे चित्र काही भागात पाहायला मिळते. (Dhule garbage collection is not done regularly by municipal corporation)

सण-उत्सवांच्या काळात स्वच्छता ठेवण्याचे आदेश अधिकाऱ्यांकडून खालच्या यंत्रणेला देण्यात आले आहेत. आता हे सण-उत्सव काही दिवसांवर आलेले असताना मात्र काही भागात अक्षरशः कचऱ्याचे साम्राज्य पाहायला मिळते. महापालिकेच्या जुन्या इमारतीजवळील खाऊगल्ली, मौलवीगंज परिसर,

मामलेदार कचेरी आदी भागात तर कचऱ्यासह दुर्गंधीचा सामना करावा लागतो. काही ठिकाणी तर भररस्त्यावरील कचरा जाळण्याचा प्रकारही होत आहे. महापालिकेच्या यंत्रणेचे मात्र याकडे लक्ष नसल्याचे दिसते. कचरा संकलनावर कोट्यवधी रुपये खर्च करूनही परिस्थिती सुधारत नसेल तर उपयोग काय, असा प्रश्‍न यातून निर्माण होतो. (latest marathi news)

काही भागात त्या-त्या भागातील स्वच्छता निरीक्षक व कर्मचाऱ्यांचे स्वच्छतेबाबत तुलनेने चांगले काम असल्याचे कुणीही नाकारत नाही. मात्र, सर्वत्र अशी स्थिती दिसत नाही. विशेषतः शहराच्या मुख्य भागात, वर्दळीच्या ठिकाणी कचऱ्याचे साम्राज्य संपूर्ण शहराचा कचरा करतात हेही नाकारता येत नाही.

अधिकाऱ्यांना समस्या दिसत नाही असे नाही पण तक्रारी झाल्याशिवाय, आंदोलने झाल्याशिवाय कार्यवाही होत नाही हेही तेवढेच खरे. यातून संपूर्ण स्वच्छता अभियानावर पाणी फिरत असल्याचे दिसते.